Երեկվանից սկսած Հայկական զինուժը երեք կորուստ ունի, որոնցից մեկը՝ մարտական: Պաշտպանության նախարարությունից հայտնում են, որ Գեղարքունիքի մարզի Վերին Շորժայի սահմանային հատվածում հակառակորդի արձակած կրակահերթերից հետո սկսված փոխհրաձգության հետեւանքով մահացու հրազենային վիրավորում է ստացել պայմանագրային զինծառայող, 32-ամյա կրտսեր սերժանտ Խուրշուդյանը։ Գերատեսչությունը նշում է, որ իրավիճակն այս պահին վերահսկելի է, կրակոցներ չկան։ Երեկ երեկոյան, նախնական տվյալներով, զենքի օգտագործման կանոնների խախտման հետեւանքով արձակված կրակոցից մահացու հրազենային վիրավորում է ստացել ժամկետային զինծառայող, 19-ամյա շարքային Մկրտիչ Հովհաննեսի Հովհաննիսյանը։ Քննություն է ընթանում դեպքի բոլոր հանգամանքները պարզելու համար: Այսօր կեսօրից հետո զորամասում հայտնաբերվել է 20-ամյա ժամկետային Մհեր Կարենի Հովհաննիսյանը գլխի շրջանում մահացու հրազենային վիրավորումով: Այս դեպքով եւս կատարվում է քննություն:

«Հայաստան» դաշինքի ղեկավարների ասուլիսին երկրորդ նախագահ Ռոբերտ Քոչարյանը հայտարարել է, որ իրենց բանաձեւը արժանապատիվ խաղաղությունն է: «Մարդ կարող է չոքած կամ չորեքթաթ տալով խաղաղ ապրել: Եթե պատրաստ եք նման խաղաղության, ուրեմն ընտրեք այսօրվա քաղաքական թիմին եւ չորեքթաթ ապրեք ամբողջ կյանքում: Այո, մենք բերելու ենք արժանապատիվ խաղաղություն»,- ասել է նա: Քոչարյանը ցանկություն չունի մեկնաբանել առաջին նախագահին, որն իր վերջին հոդվածում 2-րդ եւ 3-րդ նախագահներին մեղադրում էր պահանջատիրության եւ առավելապաշտության մեջ։ «Ես 10 տարի եղել եմ նախագահ, եւ չի եղել համանախագահների որեւէ առաջարկ, որն ընդուներ Ադրբեջանը եւ մերժեր Հայաստանը», ասել է նա։ Քոչարյանը չի հերքում, որ Փաշինյանը վարկանիշ ունի, բայցեւ մեծ հավատ չի ընծայում հարցումների նկատմամբ, քանի որ երկրում, նրա խոսքով, առողջ մթնոլորտ չէ:

Միասնական ցուցակով ընդդիմադիր դաշտի մասնակցության կոչերի վերաբերյալ, Ռոբերտ Քոչարյանը տարակուսել է. «Ձեզ մոտ հարց չէ՞ր առաջանա, բա հետո ինչպե՞ս եք աշխատելու: Այդ ֆորմատով ինչպե՞ս եք երկիր կառավարելու: Այդ դեպքում դուք իրավունք կունենայիք ասելու, որ ձեր նպատակը մեկ մարդու հեռացնելն է, այլ ոչ թե երկրի առջեւ կանգնած խնդիրները լուծելը»: Իր եւ երրորդ նախագահ Սերժ Սարգսյանի տարաձայնությունների մասին հարցին նա արձագանքել է. «Դուք ճանաչու՞մ եք երկու մարդու, որոնք ընդհանրապես տարաձայնություն չունենան։ Մենք գնում ենք մեր ճանապարհով, իրենք՝ իրենց»: Ընտրություններում բոլորը բոլորի մրցակիցն են, բայց, ըստ նրա, այս ընտրությունների ժամանակ կան մրցակիցներ, որոնց հետ կան անհաղթահարելի տարաձայնություններ: «Հայաստան» դաշինքի առաջնորդն ասել է նաեւ, որ Ադրբեջանը երբեք չպետք է օրակարգ թելադրի Հայաստանին, ինչն այսօր մենք տեսնում ենք: Նա ւ ցանկություն չունի մեկնաբանել նաեւ ԱԽ քարտուղար Արմեն Գրիգորյանի հայտարարությունները:

Ռուսաստանի Պետդումայի ԱՊՀ գործերի հանձնաժողովի նախագահի առաջին տեղակալ Կոնստանտին Զատուլինը կարծում է, որ Բաքուն շահագրգռված է ընտրություններում Նիկոլ Փաշինյանի հաղթանակով: Դա, ըստ նրա, պայմանավորված է հանգամանքով, որ Փաշինյանի հետ հեշտ է աշխատել, նա պարտության հոմանիշն է, նրա վրա հեշտ է ճնշում գործադրել: «Մենք կարծում ենք, որ հայ ժողովուրդը իմաստուն ժողովուրդ է, մեր պատմական դաշնակիցը, մեր ընկերը, եւ մենք չենք ցանկանում մեր տեսակետը պարտադրել նրանց», ասել է Զատուլինը, հավաստիացնելով, որ Ռուսաստանը չի միջամտում Հայաստանի ներքաղաքական գործընթացներին:   

Սուրբ Աթոռում Հայաստանի նախկին դեսպան Միքայել Մինասյանը ահազանգում է, որ Փաշինյանը Թուրքիայի ու Ադրբեջանի հետ գաղտնի, սեպարատ բանակցությունների մեջ է՝ շրջանցելով ու փաստի առաջ կանգնեցնելով Ռուսաստանին: Նա տարակուսել է, որ 2018-ից առաջ մեկ ծառահատման համար հանրային իրարանցում էր սկսվում, իսկ հիմա թշնամու զորքը 13 օր է Հայաստանի տարածքում է, բայց բոլորը լուռ են: Մինասյանը նշել է, որ Փաշինյանը գաղտնի, նրա բառերով՝ ժողովրդի մեջքի հետեւում պատրաստվում էր ստորագրել դավաճանական նոր փաստաթուղթ, որի արդյունքում Հայաստանը հրաժարվում է Արցախից, թշնամուն է հանձնվում Հայաստանից նոր տարածքներ, ինչի դիմաց Ադրբեջանը հանում է զորքերը Սյունիքից ու Գեղարքունիքից։ «Փաստորեն, Ադրբեջանը զորք է մտցրել Հայաստան, որպեսզի ստիպի Նիկոլին ստորագրել այդ 100% հայանպաստ փաստաթուղթը եւ սպառնում է, որ միայն այդ պարագայում կհանի զորքը», գրել է նախկին դեսպանը։   

Հայաստանի մարդու իրավունքների պաշտպան Արման Թաթոյանը մտահոգություն է հայտնել, որ որոշ պաշտոնյաներ ու հանրային գործիչներ վերջին օրերին երկրի սահմանների մասին անում են խիստ վտանգավոր հայտարարություններ, խոսում մեխանիկական մոտեցումներով՝ հղումներ անելով ինչ-որ քարտեզների: «Այդ պաշտոնյաներին ու հանրային գործիչներին զգուշացնում եմ՝ ձեր մեխանիկական հայտարարություններն ուղղակիորեն հակասում են Հայաստանի ողջ բնակչության իրավունքներին ու օրինական շահերին: Դրանք թմրեցնում են մեր ժողովրդի զգոնությունը, վտանգում են մեր երեխաների իրավունքներն ու խաղաղ ապագան: Չպետք է մոռանալ, որ Ադրբեջանում հայատյացությունն ունի պետական հովանավորչություն: Հատուկ ընդգծում եմ, որ առկա պայմաններում Ադրբեջանի հետ միայն սահմանազատումը` առանց անվտանգության գոտու, ոչ միայն չի ապահովելու մեր քաղաքացիների ու հատկապես սահմանային բնակիչների իրավունքները, այլեւ դառնալու է իրավունքների նոր խախտումների ու նոր լարվածության պատճառ, չի ապահովելու խաղաղություն տարածաշրջանում», նշել է Թաթոյանը:   

Ամերիկացի մի քանի տասնյակ կոնգրեսականներ Ջո Բայդենի վարչակազմին կոչ են արել դադարեցրել ԱՄՆ որեւէ տեսակի ռազմական աջակցությունն Ադրբեջանին: Նրանք Բայդենին նաեւ կոչ են անում հրատապ կերպով վերանայել Ադրբեջանին տրամադրվող ռազմական օգնությունը սահմանափակող «Ազատության աջակցության ակտի» 907-րդ ուղղումից հրաժարվելու որոշումը: «Ամերիկյան հարկերից գանձված անգամ մեկ դոլար չպետք է ուղարկվի՝ զինելու նավթային պաշարներով հարուստ Ադրբեջանի զինված ուժերը՝ մի երկիր, որն Արցախը էթնիկ զտման ենթարկեց, շարունակում է պահել հայ ռազմագերիներին, իսկ հիմա օկուպացրել է տարածք Հայաստանում»,- նշել է կոնգրեսական Դեւիդ Վալադաոն:   

Երկրորդ նախագահ Ռոբերտ Քոչարյանի եւ նախկին փոխվարչապետ Արմեն Գեւորգյանի գործով դատական նիստը հետաձգվել է երեք շաբաթով: Գեւորգյանի փաստաբան Էրիկ Ալեքսանյանից միջնորդություն է ստացվել արձակուրդ մեկնելու պատճառով նիստը հետաձգելու մասին: Ալեքսանյանը արձակուրդից կվերադառնա հունիսի 9-ին: Դատախազ Գեւորգ Բաղդասարյանը մատնանշել է դատարանի նկատմամբ անհարգալից վերաբերմունքը: Քոչարյանի փաստաբան Արամ Վարդեւանյանն էլ հիշեցրել է նախորդ դատական նիստերին դատախազների բացակայության մասին, նաեւ ասել, որ ինքը նույնպես արձակուրդ է մեկնելու մինչեւ հունիսի 19-ը: Դատարանը նշել է, սակայն, որ Քոչարյանն այլ փաստաբաններ էլ ունի:   

Տնտեսական առաջընթացի մասին հերթական գրառումն է Ֆեյսբուքում արել Էկոնոմիկայի նախարարի պաշտոնակատար Վահան Քերոբյանը՝ հարուցելով բազմաթիվ օգտատերերի տարակուսանքը: «Տնտեսական ակտիվության ցուցանիշն ապրիլին` +23.2%, իսկ առաջին չորս ամսվանը` +2.6%։ Երկնիշ տնտեսական աճն իհարկե լինելու է, Հայաստանն արդեն շինհրապարակ է, գյուղատնտեսությունը վայելում է մասշտաբային օժանդակություն, ներդրումները հորդում են, աշխատատեղերն` ավելանում։ Ձեր խոնարհ ծառա», գրել է նա։ Տնտեսագետ Սուրեն Պարսյանը NEWS.am-ին ասել է, որ եթե ներդրումների հորձանք լիներ՝ Քերոբյանն ամեն օր երկրով մեկ կարմիր ժապավեններ պետք է կտրեր:   

Երեւանի ավագանու նիստին «Իմ քայլը» խմբակցության անդամ Արմեն Գալջյանը ներկայացրեց իր եւ իր 5 գործընկերների նախագիծը, որով առաջարկում էին մանդատից զրկել իրենց խմբակցության մեկ այլ անդամի՝ Գեւորգ Աճեմյանին: Գալջյանը նշել է, որ մանդատը ստանալու օրվանից Աճեմյանը չի մասնակցել ավագանու հերթական որեւէ նիստի, նաեւ անձնական շահերով պայմանավորված պախարակում է նախկին թիմակիցներին: Ընդդիմադիր անդամները հիշեցրել են, որ «Իմ քայլից» ուրիշներն էլ են բացակայում նիստերից, բայց մանդատից զրկվում է միայն քննադատող թիմակիցը: 37 կողմ, 5 դեմ ձայներով Գեւորգ Աճեմյանը զրկվել է մանդատից:   

Հայաստանում կորոնավիրուսով վարակվելու 157 նոր դեպք է գրանցվել, վարակվածների ընդհանուր թիվը հասել է 222139-ի: Մեկ օրում մահացել է 8 վարակված, մահացածների ընդհանուր թիվը 5477 է:

Վրաստանը որոշել է հունիսի 1-ից ճանապարհորդների համար բացել հարեւանների հետ ցամաքային սահմանները, որոնք 2020 թվականի մարտից փակ էին համավարակի պատճառով: Սակայն կան նաեւ նախապայմաններ. Վրաստանի ծովափ մեկնողները կարող են անցնել հայ-վրացական սահմանը վերջին 72 ժամվա ընթացքում արված PCR թեստի բացասական պատասխանի առկայության կամ պատվաստման ամբողջ կուրսն անցնելու պարագայում:   

Միացյալ Նահանգներում հնչել են հերթական կրակոցները: Երեքից ավելի մարդ է սպանվել երկուշաբթի Օհայո նահանգի Ուեսթ Ջեֆերսոն քաղաքում: Զոհերից երեքը հայտնաբերվել են Ջեքսոն սթրիթի վրա գտնվող տներից մեկում, եւս մի քանի դի հայտնաբերվել է շենքի մոտ, սակայն դրանց ճշգրիտ թիվը դեռ հայտնի չէ: Ոստիկանությունը զննում է տարածքը, պարզում զոհերի ինքնությունը:   

Հայ հանրության շրջանում վրդովմունքի ալիք է բարձրացրել համաշխարհային ֆուտբոլի հայ աստղ Հենրիխ Մխիթարյանին հավաքականի առաջիկա հավաքին չընդգրկելը. շատերի համոզմամբ, դա ոչ թե ազգային թիմի մարզչի, այլ քաղաքական իշխանության որոշումն է: Մխիթարյանի համար անակնկալ է եղել Խորվաթիայի եւ Շվեդիայի հավաքականների հետ առաջիկա ընկերական խաղերին մասնակցելու հրավեր չստանալը։ «Ի զարմանս ինձ, հավաքականի մարզչական շտաբից տեղեկացվեցի, որ ինչ-ինչ պատճառներով հրավիրված չեմ առաջիկա ընկերական խաղերին: Պաշտոնական հիմնավորումներն ինձ համար համոզիչ չեն: Այնուամենայնիվ, ես կանգնած եմ մեր տղաների կողքին եւ լավագույնն եմ մաղթում առաջիկա խաղերում»,- գրել է Մխիթարյանը, որն ի դեպ մաիկն է «Ռոմայից», որ ընդգրկվել է Իտալիայի Ա սերիայի խորհրդանշական հավաքականում: Այդ խաղերը կայանալու են հունիսի 1-ին եւ 5-ին:   

ԱՄՆ դոլարի փոխարժեքը, նախորդ օրվա համեմատ նվազելով 0.01 դրամով, կազմել է 520.57 դրամ: Եվրոյի փոխարժեքն աճել է 2.28 դրամով ու հասել 638.01 դրամի, բրիտանական ֆունտի փոխարժեքն աճել է 2.43 դրամով ու հասել 738.22 դրամի, իսկ ռուսական ռուբլու փոխարժեքն աճել է 0.03 դրամով ու կազմել 7.10 դրամ:   

Մայիսի 26-ին երկրի շրջանների զգալի մասում ժամանակ առ ժամանակ սպասվում են անձրեւներ եւ ամպրոպ, հնարավոր է կարկուտ։ Օդի ջերմաստիճանը կշարունակի նվազել: Երեւանում եւս սպասվում են անձրեւ եւ ամպրոպ: Գիշերը մայրաքաղաքում կլինի 13-ից 15, վաղը ցերեկը 24-ից 26 աստիճան զրոյից բարձր: