Նախագահ Ջո Բայդենը խիստ ռեժիմ է պահպանում, ինչպես նաեւ պայքարում է քաղցրավենիքի նկատմամբ հակվածության դեմ: The Washington Post թերթը զրուցել է ավելի քան տասը մարդու հետ, որոնք Բայդենի մտերիմներն են՝ ստանալով հազվագյուտ հնարավորություն ծանոթանալ աշխարհում ամենահզոր մարդու կյանքի մեկ օրվա հետ:
79-ամյա Բայդենն ԱՄՆ ամենատարեց նախագահն է եւ սկսում է իր օրն անձնական մարզչի հետ ուժային մարզումներից, որպեսզի պահպանի ֆիզիկական ակտիվությունը: Նա նախընտրում է առողջ սնունդ՝ ապուրներ եւ աղցան ճաշին: Սակայն Բայդենը նաեւ քաղցրակեր է եւ պարբերաբար վայելում է Gatorade նարնջի հյութ եւ շոկոլադե թխվածքաբլիթ:
Օվալային աշխատասենյակում նա ունի անհատական փաթեթավորմամբ շոկոլադե թխվածքաբլիթներ եւ իրիսներ աղաջրով Dolle's-ից Դելեվերում, ուր նա մեկնում է հանգստյան օրերին: Նախորդ հարցազրույցներում նա ասել էր, որ չի կարող ապրել առանց սիրելի ուտելիքի՝ պաղպաղակի: «Նա ունի հնգամյա երեխայի ճաշակ»,- Post-ին ասել է Բայդենի խորհրդականը:
Բայդենը սիրում է զբոսնել Հարավային պուրակում կամ Ռոզարիայում, որպեսզի մաքուր օդ շնչի եւ ապահովի իր գերմանական հովվաշների զբոսանքը:
Ի տարբերություն Fox News-ի կողմնակից Դոնալդ Թրամփի՝ Բայդենը հաճախակի չի դիտում հեռուստատեսություն, սակայն նախընտրում է CNN հեռուստաալիքի «Նոր օրը» կամ MSNBC-ի «Առավոտյան Ջո»-ն մարզումների ժամանակ:
Օգնականները նկարագրել են նախագահին՝ որպես «բու»: Սովորաբար նա վերադառնում է Սպիտակ տան նստավայր երեկոյան 18-19-ին, որպեսզի ընթրի տիկնոջ՝ Ջիլի հետ նախքան խորհրդականների հետ զրուցելը:
Ամուսնական զույգն ունի ջերմ հարաբերություններ, մի քանի անգամ զրուցում է հեռախոսով: Հայտնի է, որ նա ընդհատում է ցանկացած զբաղմունքը, որպեսզի պատասխանի ընտանիքի անդամների հեռախոսազանգերին:
Ամեն գիշեր քնելուց առաջ նախագահը զանգահարում է իր որդուն՝ Հանթերին, որը տարիներ շարունակ պայքարել է թմրանյութից եւ ալկոհոլից կախվածության դեմ: The Post-ի աղբյուրները հայտնել են, որ եթե Հանթերը չպատասխանի զանգին, Բայդենը նրան հաղորդագրություն կուղարկի:
Շաբաթը մեկ անգամ նա ճաշում է իր փոխնախագահ Քամալա Հարիսի հետ՝ հետեւելով սխեմային, որը նա հաստատել էր Բարաք Օբամայի հետ:
Սպիտակ տան մամուլի քարտուղար Ջեն Փսակին չի հաստատել նախագահի մարզումների ռեժիմի մանրամասները երկուշաբթի ճեպազրույցի ժամանակ, սակայն կատակել է, որ «երբեմն դժվար է մրցել նրա հետ»՝ նկատի ունենալով նրա դիմացկունությունը:
