Հայ-ռուսական ռազմավարական դաշինքը մեզ ավելի ուժեղ եւ հզոր է դարձնում, եւ մենք կարող ենք դիմակայել տարբեր արտաքին մարտահրավերների ու սպառնալիքների: Այս մասին Երեւանում «Ռուսաստանի ռազմավարական դաշնակցի կերպարը ժամանակակից հայկական հասարակությունում» համաաժողովի բացմանն ասաց քաղաքական վերլուծաբան, Եվրասիական փորձագիտական ակումբի համակարգող Արամ Սաֆարյանը:
Նրա խոսքով՝ համաժողովի խնդիրն է նաեւ հասկանալ, թե «ինչ կարող ենք անել մենք, Ռուսաստանի հավատարիմ բարեկամներս, հայկական գիտական եւ փորձագիտական համայնքի ներկայացուցիչներս, որքանով ենք պատրաստ արձագանքել ժամանակի պահանջներին, հայ-ռուսական ռազմավարական միությունը ամրապնդելու ժողովրդի ցանկություններին, դրան նոր ժամանակակից հնչեղություն հաղորդելուն, այն Հայաստանի Հանրապետության զարգացմանը, հայ հասարակության զարգացմանն ու բարգավաճմանը ծառայեցնելուն»:
«Մենք հասկանում ենք, որ այսօր մենք՝ գիտության, փորձագիտական համայնքի ներկայացուցիչներս, հրապարակախոսներս եւ լրագրողներս, կարող ենք եւ պարտավոր ենք շատ բան անել, ավելի շատ ջանքեր գործադրել, որպեսզի մեր Միության հակառակորդները չօգտագործեն տարբեր իրական կամ մտացածին պատրվակներ՝ մեր հարաբերությունները Ռուսաստանի հետ վատթարացնելու համար, որպեսզի Հայաստանին միայնակ թողնեն իր թշնամիների հանդիման: Մենք ոչ մի կերպ չենք կարող մեզ թույլ տալ նման շքեղություն: Եւ այդ պատճառով ես հավատում եմ, որ հայ հասարակության լավագույն ներկայացուցիչները, որոնք Եվրասիական փորձագիտական ակումբի անդամներ են հանդիսանում, մտադիր են փնտրել նոր, դեռեւս չօգտագործված հնարավորություններ՝ Ռուսաստանի հետ ռազմավարական դաշինքը խորացնելու համար»,- հայտարարեց Արամ Սաֆարյանը՝ վերահաստատելով ջերմ եղբայրական անփոփոխ վերաբերմունքը հզոր Ռուսաստանի, նրա դիվանագետների եւ զինվորականների նկատմամբ, ովքեր գտնվում են Հայաստանի տարածքում:
