Մայիսի 27-ին եւ հունիսի 1-ին Երկրին բավական մոտ հեռավորության վրա երկու խոշոր աստերոիդ է անցնելու: Այս մասին հայտնել է ՆԱՍԱ-ի Ռեակտիվ շարժման լաբորատորիայի Երկրի շուրջ օբյեկտների ուսումնասիրության կենտրոնի (CNEOS) մամուլի ծառայությունը:
Գիտնականների գնահատմամբ՝ տիեզերական օբյեկտներից առաջինը՝ 2021 JF1-ը, ավելի մեծ է, քան Նյու Յորքի Ազատության արձանը՝ 94-210 մետր տրամագծով: Այն շարժվում է մոտ 17 կիլոմետր վայրկյան արագությամբ եւ մայիսի 27-ին թռչելու է Երկրին շատ մոտ, հայտնել է «ՌԻԱ Նովոստի»-ն:
ՆԱՍԱ-ն այն դասել է «Ապոլոն» խմբի՝ Երկրին մոտեցող ամենավտանգավոր օբյեկտների շարքին:
Երկրորդ աստերոիդը՝ 2021 KT1-ը, թռչում է մոտ 18 կիլոմետր վայրկյան արագությամբ, իսկ տրամագիծը կազմում է 150-330 մետր (կարելի է համեմատել Փարիզի Էյֆելյան աշտարակի հետ): Աստղագետները կարծում են, որ այն Երկրին կմոտենա հունիսի 1-ին եւ կանցնի 13 միլիոն կիլոմետր հեռավորության վրա: