News
Լրահոս
News
Հինգշաբթի
Հունվար 20
USD
481.66
EUR
546.54
RUB
6.29
Տեսնել լրահոսը


Առաջին անգամ Հանրապետության տոնին գլխավոր հանդիսավայրը փակ է եղել լրագրողների եւ քաղաքացիների համար: Լրագրողներին թույլ չեն տվել մոտենալ Սարդարապատի հուշահամալիրին: Ոստիկանության աշխատակիցները փակել են դեպի հուշահամալիր տանող գլխավոր մայրուղին: Լրագրողներին հայտնի է դարձել, որ իրենց մուտքը նույնպես արգելվելու է այնքան ժամանակ, քանի դեռ Սարդարապատում է վարչապետի պաշտոնակատար Նիկոլ Փաշինյանը: Միջոցառումը լուսաբանելու իրավունք է ստացել միայն Հանրային հեռուստաընկերությունը: Խնդրին անդրադարձել է մարդու իրավունքների պաշտպանը.Արման Թաթոյանը հուշել է, որ արգելքի դեպքում լրագրողներին պետք է նախապես զգուշացնեին, ոչ թե հենց Սարդարապատի ճանապարհին դա անեին:   

Սարդարապատի հուշահամալիրում միջոցառումը շատ համեստ էր եւ շատ կարճ է տեւել: Պետական պաշտոնյաներից մասնակցել են միայն վարչապետի պաշտոնակատար Նիկոլ Փաշինյանը, նախագահ Արմեն Սարգսյանը եւ Ազգային Ժողովի նախագահ Արարատ Միրզոյանը: Նրանք ծաղիկներ են դրել հուշահամալիրում, ապա մոտեցել են օտարերկրյա դեսպանները եւ նույնպես ծաղիկներ խոնարհել, ինչով էլ միջոցառումը սահմանափակվել է: Առաջին անգամ Արցախի նախագահը պաշտոնական հրավեր չի ստացել եւ չի մասնակցել ազգային տոնին:   

Ամենայն Հայոց Կաթողիկոսը դարձյալ պետական պաշտոնյաներից առանձին է ժամանել հանդիսավայր, նա հրաժարվել է պատասխանել հարցին՝ արդյոք դեռ պահանջում է Փաշինյանի հրաժարականը՝ ասելով, որ օրվա խորհրդից չի ցանկանում հեռանալ: «Մեր մաղթանքն է, որ մեր ժողովուրդն իր կյանքն ապրի Սարդարապատի խորհրդին ունկդիր, ոգեշնչվի Սարդարապատի խորհրդով»,- ասել է Գարեգին վեհափառը։

Երկրորդ նախագահ, «Հայաստան» դաշինքի առաջնորդ Ռոբերտ Քոչարյանը Վանաձորում է ծաղիկներ խոնարհել Ղարաքիլիսայի ճակատամարտի հուշահամալիրին:   

Երրորդ նախագահ Սերժ Սարգսյանը Ղարաքիլիսայի ճակատամարտի հերոսների եւ առաջին հանրապետությունը կերտողների հիշատակը հարգել է Վանաձորի «Կոտրած եկեղեցի» կոչվող վայրում: «Խաղաղություն տրվում է այն ազգերին, որոնք գիտեն արժանապատվորեն պայքարել դրա համար», նշված է երրորդ նախագահի գրասենյակի տարածած հաղորդագրությունում:

Ադրբեջանցի զինվորականները Կութ գյուղի սահմանային հատվածում մի քանի անգամ օդ են կրակել: Պաշտպանության նախարարությունը հայտարարել է, որ իրավիճակը հանգիստ է, նույն պատկերն է նաեւ Սեւ լճի տարածքում։ Իսկ Ադրբեջանի պաշտպանության նախարարության հայտարարությունը՝ իբր հայկական կողմից արձակված կրակոցից ադրբեջանցի զինծառայողի վիրավորվելու վերաբերյալ, հերթական բացահայտ սուտն է, ադրբեջանի զինվորի վիրավորվելու պատճառն այլ տեղ է պետք փնտրել, նշված է գերատեսչության հաղորդագրությունում:   

Հրաժարական է տվել Արցախի պետական նախարար-ֆինանսների նախարար Գրիգորի Մարտիրոսյանը: Նա լիազորությունները վայր կդնի հունիսի 1-ից: Մարտիրոսյանը գրել է, որ պաշտոնը թողնելու որոշումը կայացրել էր դեռ 2020-ին, սակայն պատուհասած պատերազմը եւ հետպատերազմյան ճգնաժամային իրավիճակում առաջնահերթ լուծում պահանջող խնդիրները ստիպել են հետաձգել որոշումը:   

Մամուլը գրում է, որ Հայաստանի արտգորրծնախարարի հրաժարականից հետո դիմումներ են գրել նաեւ նրա տեղակալները: Նշվում է, որ Արա Այվազյանը Փաշինյանին հորդորել է Անվտանգության խորհրդի նիստին չհայտարարել բազմազգ դիտորդներ հրավիրելու մասին, սակայն գործադիրի ղեկավարն անդրդվելի է մնացել ու նրա հետ չհամաձայնեցված հայտարարություն է արել, ինչից հետո նախարարը հրաժարական է տվել: Արտաքին գործերի փոխնախարարներին համոզել են հրաժարականները չհրապարակել, քանի դեռ նրանց փոխարինողներ չեն գտել: Մամուլը գրում է, որ պաշտպանության նախարարության եւ Ազգային անվտանգության ծառայության մի շարք բարձրաստիճան պաշտոնյաներ նույնպես Փաշինյանի վերջին հայտարարությունից հետո որոշել են հեռանալ համակարգից:   

Լեւոն Տեր-Պետրոսյանը Հանրայինի եթերում հայտարարել է, որ այսօր Ռուսաստանի հետ պետության բանակցողը Փաշինյանն է, տարածաշրջանում իր ծրագրերի մասին Ռուսաստանը միայն նրան է ասում: «Բայց նա չի հասկանում իրեն ինչ են ասում», ասել է նա: Նախկին նախագահը քաղաքացիական պատերազմի վտանգ է տեսնում. «Համարյա ճակատամարտի են անցել քոչարյանականներն ու փաշինյանականները, վախենում եմ, որ այս ընտրությունները կարող են վերածվել ուղղակի կռիվների, եթե չասենք՝ քաղաքացիական պատերազմի, կենաց մահու խնդիր են լուծում երկու կողմն էլ»,- ասել է առաջին նախագահը: Տեր-Պետրոսյանը նորմալ չի համարում ընտրություններին 27 քաղաքական ուժի մասնակցությունը. «Սա մեզ համար նշանակում է պառլամենտական կործանում», ասել է նա, ավելացնելով, որ կամ Փաշինյանն է հաղթելու կամ Քոչարյանը: «Կա ավելի վատ տարբերակ՝ ոչ մեկը չի հաղթելու եւ մենք ընկնելու ենք այդ խայտաբղետ պառլամենտական համակարգի մեջ», ասել է Տեր-Պետրոսյանը:   

Առաջին նախագահին Աջափնյակում համակիրների հետ հանդիպմանը հակադարձել է Նիկոլ Փաշինյանը: «Նա ասում է՝ ինչի՞ ես հայտարարել «Արցախը Հայաստան է եւ վերջ»: Իր տեսակետից ճիշտ է ասում, որովհետեւ իր տեսակետը հետեւյալն է՝ Ղարաբաղը Ադրբեջան է եւ վերջ: Եթե իրենք գտնում են, որ Ղարաբաղն Ադրբեջան է եւ վերջ, մենք դրան համաձայն չենք»,- ասել է նա: «Ես հո չեմ կարող ինձ Լեւոն Տեր-Պետրոսյանի նման պահել», ասել է վարչապետի պաշտոնակատարը՝ նկատի ունենալով Տեր-Պետրոսյանի այն հայտարարությունը, որ ինքն ու Ռոբերտ Քոչարյանը պարբերաբար հեռախոսով շփվում են:   

ՀԱԿ խոսնակ Արման Մուսինյանը ֆեյսբուքում ներկայացրել է Լեւոն Տեր-Պետրոսյանի պատասխանը Նիկոլ Փաշինյանի այսօրվա հայտարարությանը, նաեւ գրառմանը, թե Տեր-Պետրոսյանի դիրքորոշումը հետեւյալն է. «Պետք է Ղարաբաղը ամբողջությամբ տանք Ադրբեջանին»: «Այս գրառմամբ Փաշինյանն ապացուցեց, որ իսկապես քաղաքականությունից ոչինչ չի հասկանում: Չի հասկանում ո՛չ իր ընդդիմախոսների եւ ո՛չ նույնիսկ դաշնակիցների, ինչպիսին է Ռուսաստանը, ուղիղ, շիտակ ասված խոսքերը: Ավելին, նա չի հասկանում անգամ, թե ինչում մեղադրում է Առաջին նախագահին, ասելով, թե վերջինս ուզում է Ղարաբաղը հանձնել Ադրբեջանին, մի բան է, որ ինքն արդեն «փառավորապես» իրականացրել է՝ Ղարաբաղը ոտքով-գլխով հանձնել է Ադրբեջանին», նախկին նախագահի խոսքն է փոխանցել Մուսինյանը:

ԿԳՄՍ նախարարությունը պետք է տրոհվի. «Հայաստան» դաշինքի ակտիվի հետ հանդիպմանը երկրորդ նախագահ Ռոբերտ Քոչարյանն ասել է, որ այսօր մենք լրջագույն խնդիր ունենք կրթության ոլորտում՝ եւ կառավարման, եւ բովանդակային առումով: «Հիմա եթե մենք հետեւողականորեն կրթությունից ուզում ենք հանել ազգային բաղադրիչը, հայ լինելու հանգամանքը, ապա ստացվում է, որ մենք ուղղակի ինչ-որ գիտելիքների ծավալ ենք տալիս, բայց քաղաքացի չենք դաստիարակում»,- ասել է նա՝ վերջին տարիներին կրթության համակարգի հետ արվածը բնորոշելով որպես աղետ:   

Տարածքային կորուստներն այնպիսին են, որ մենք մեր առջեւ պետք է ռեալ խնդիրներ դնենք, ասել է Քոչարյանը: «Մենք պետք է կարողանանք պահել գոնե այն, ինչ կա այսօր եւ փորձել Ղարաբաղի կարգավիճակը քննարկելու ժամանակ լուծել ԼՂԻՄ-ի սահմանների վերականգնման խնդիրը», ասել է նա՝ նշելկով, որ այդ հնարավորությունը տեսնում է առաջիկա մի քանի տարիներին, ինչի համար պետք է բանակը հզորացնել, ապահովել առանցքային մի քանի արդիականացված զինատեսակներով:   

Մոսկվայում կայացել է Ռուսաստանի ու Հայաստանի պաշտպանության նախարարների հանդիպումը: Սերգեյ Շոյգուն ասել է, որ օրակարգում տարածաշրջանային անվտանգության հարցերն են, կապված Լեռնային Ղարաբաղում խաղաղապահ ուժերի աշխատանքի հետ, եւ այս պահի դրությամբ ծագած բոլոր սուր խնդիրները: Շոյգուն ասել է նաեւ, որ Ռուսաստանը եւ Հայաստանը ամրապնդում են ռազմական համագործակցությունը ինչպես երկկողմ ձեւաչափով, այնպես էլ միջազգային կառույցների, առաջին հերթին՝ ՀԱՊԿ-ում:   

Սիրիայի նախագահական ընտրություններում հաղթել է գործող նախագահ Բաշար Ասադը: Նա ստացել է ընտրողների 95,1 տոկոսի աջակցությունը, մասնակցել է 14 միլիոն քաղաքացի կամ ընտրողների 78 տոկոսը: Ասադը 55 տարեկան է, Սիրիայի նախագահն է 34 տարեկանից:   

Հայաստանում կորոնավիրուսով վարակվելու 104 նոր դեպք է գրանցվել, վարակվածների ընդհանուր թիվը 222513 է: Այս պահին բուժվում է 4443 վարակված: Մեկ օրում մահացել է 9 վարակված, նրանցից 2-ը՝ այլ հիվանդությունից: Մահացածների ընդհանուր թիվը 5504 է:   

Տոնով պայմանավորված արտարժույթի համեմատ դրամի կուրսը փոփոխությունների չի ենթարկվել: ԱՄՆ դոլարի փոխարժեքը 520.78 դրամ է, Եվրոյի փոխարժեքը՝ 635.04 դրամ, բրիտանական ֆունտի փոխարժեքը 735.45 դրամ, իսկ ռուսական ռուբլու փոխարժեքը 7.09 դրամ:

Մայիսի 29-ին երկրի առանձին շրջաններում սպասվում են անձրեւ եւ ամպրոպ, հնարավոր է կարկուտ։ Երեւանում սպասվում է առանց տեղումների եղանակ։ Գիշերը մայրաքաղաքում կլինի 17-19, վաղը ցերեկը 31-33 աստիճան զրոյից բարձր:   

Տպել
Կարդացեք նաև
Ամբողջը
Ինչպե՞ս են հայերը Սպահանում դիմավորել Ամանորը
Իրանահայ համայնքը Իրանի ազգային փոքրամասնություններից ամենախոշորն է․․․
Լուրեր Հայաստանից ու աշխարհից «մեկ տողով»․ 28․05․2021
Այսօր առավոտյան հերթական անգամ հայ հանրությունը փոթորկվեց սահմանից ստացված լուրից: Գեղարքունիքի սահմանային գոտում...
Լուրեր Հայաստանից ու աշխարհից «մեկ տողով»․ 26․05․2021
Սյունիքում երեկ հերթական բախումն է տեղի ունեցել հայ զինծառայողների եւ Հայաստանի տարածք ներխուժած ադրբեջանցի զինվորականների միջեւ...
Լուրեր Հայաստանից ու աշխարհից «մեկ տողով»․ 25․05․2021
Երեկվանից սկսած Հայկական զինուժը երեք կորուստ ունի, որոնցից մեկը՝ մարտական...
Լուրեր Հայաստանից ու աշխարհից «մեկ տողով»․ 24․05․2021
Վերջին օրերին լուրեր էին շրջանառվում, որ 44-օրյա պատերազմի օրերին Ջրականից նահանջելիս 160 հայ զինվոր անցել...
Լուրեր Հայաստանից ու աշխարհից «մեկ տողով»․ 21․05․2021
Ողբերգական վթարի հետևանքով ժամկետային զինծառայող է մահացել․․․
Ամենաշատ