Անվտանգության ողնաշարը բանակն է, որի վերականգնումը մի քանի բաղադրիչ ունի՝ բանակի կազմակերպվածությունը, համալրումը մարդկային ռեսուրսներով, հարաբերակացությունը ժամկետային և պայմանագրային զինծառայողների։ Այս մասին այսօր՝ մայիսի 29-ին, Սպիտակ համայնքի քաղաքացիների եւ «Հայաստան» դաշինքի ակտիվի հետ հանդիպման ժամանակ նշեց ՀՀ երկրորդ նախագահ, «Հայաստան» դաշինքը գլխավորող Ռոբերտ Քոչարյանը:
«Սա պետք է գնահատել, և այստեղ մենք շատ արագ կարող ենք վերականգնել։ Ես կարծում եմ՝ վեց ամսից մեկ տարի անց այդ բաղադրիչը մենք պետք է լուծենք։ Մենք պետք է այնքան մարդ ունենանք բանակում, որ սահմանի ողջ խտությամբ դիրքավորվենք, ոչ թե պատերազմելու, այլ նման խայտառակ իրավիճակներ չունենալու համար»,- ասաց Ռոբերտ Քոչարյանը։
Ռոբերտ Քոչարյանի կարծիքով՝ բանակը վերականգնելու համար հաջորդիվ պետք է հասկանալ, թե պատերազմում ինչ կորուստներ ենք կրել։
«Այսօր սրա անունը դրել են ռազմական գաղտնիք։ Ես մոտավոր պատկերացումներ ունեմ, որ առնվազն մի քանի միլիարդի զինտեխնիկայի կորուստ ենք ունեցել։ Այս ամենի վերականգնումը հնարավոր է բավական արագ, բայց հնարավոր է Ռուսաստանի հետ իսկական դաշնակցային հարաբերությունների շրջանակում։ Այս բաղադրիչը կունենա շատ արագ պայմանագրային լուծումներ և արդեն տեխնիկական հարցերը կմնան։ Պետք է ունենալ մի առաջնորդ, որի նկատմամբ կլինի վստահություն այս ամենը հանգիստ, կայուն իրավիճակի բերելու համար»,- ավելացրեց երկրորդ նախագահը։