Որեւէ խոչընդոտ չեմ տեսնում մեր բողոքների քննարկման եւ մեր համար դրական լուծման համար։ Այս մասին այսօր՝ մայիսի 31-ին, լրագրողների հետ զրույցում ասաց դատախազ Պետրոս Պետրոսյանը։
Նշենք, որ այսօր Վերաքննիչ դատարանում պետք է քննվեր «Մարտի 1-ի» գործը կարճելու վերաբերյալ դատարանի որոշման դեմ դատախազության բողոքը, ինչը, սակայն հետաձգվեց։
«Դիմումը վերաբերում է դատախազական լիազորություններն իրականացնելուն։ Մենք նաեւ համապատասխն իրավական ակտերի նորմերը հակասահմանադրական տեսանկյունից վիճարկելու մասով միջնորդել էինք առաջին ատյանի դատարան։ Այդ նորմերը կիրառության ենթակա են նաեւ Վերաքննիչ քրեական դատարանի կողմից, քանի Վերաքննիչը եւս պետք է ղեկավարվի այդ նորմերով՝ օրինական ուժի մեջ թողելու կամ բեկանելու առաջին ատյանի դատարանի դատական ակտը»,- նշեց դատախազը։
Ճշտող հարցին՝ այսինքն կա՞ հնարավորություն մեղադրանքը վերաորակելու, դատախազը պատասխանեց. «Ոչ միայն մեղադրանքը վերաորակվի, այլ նաեւ այս միջնորդություններն, ըստ էության, քննարկվեն եւ համապատասխան լուծում ստանան»։
Հիշեցնենք, որ Գլխավոր դատախազությունը բողոքարկել է «Մարտի 1-ի» գործով Ռոբերտ Քոչարյանի, Սեյրան Օհանյանի, Յուրի Խաչատուրովի եւ Արմեն Գեւորգյանի նկատմամբ ՀՀ ՔՕ 300.1 հոդվածի 1-ին մասով քրեական հետապնդումը դադարացնելու եւ քրեական գործի վարույթն այս մասով կարճելու մասին առաջին ատյանի դատարանի որոշումը։
Նշենք, որ Սահմանադրական դատարանը մարտի 29-ին ՀՀ ՔՕ 300.1 հոդվածը ճանաչել է ՀՀ Սահմանադրության 78-րդ եւ 79-րդ հոդվածներին հակասող։