ՀՀ քննչական կոմիտեի Արարատի մարզային քննչական վարչության Մասիսի քննչական բաժնում քննվող քրեական գործով իրականացված քննչական եւ դատավարական այլ գործողությունների արդյունքում պարզվել է, որ 2021թ. մայիսի 16-ին` ժամը 23:30-ի սահմաններում, Մասիս քաղաքի Երեւանյան փողոցում գտնվող գարեջրատան հետնամասում անձնական հարցերի շուրջ ծագած վիճաբանության ընթացքում 25-ամյա երիտասարդն իր մոտ գտնվող դանակով հարվածներ է հասցրել նույն քաղաքի բնակչի գոտկային շրջանին՝ պատճառելով մարմնական վնասվածքներ: Այս մասին NEWS.am-ին հայտնեցին ՀՀ քննչական կոմիտեի տեղեկատվության եւ հասարակայնության հետ կապերի բաժնից։
Երիտասարդը ինքնակամ ներկայացել է իրավապահներին եւ ներկայացրել հանցագործության գործիք հանդիսացող դանակը:
Կատարվել է դեպքի վայրի զննություն, որի ընթացքում հայտնաբերվել եւ վերցվել են արնանման հետքեր, առգրավվել են հագուստներ, հարցաքննվել մի շարք անձինք:
Ձեռք բերված բավարար ապացույցների համակցությամբ՝ 25-ամյա երիտասարդին մեղադրանք է առաջադրվել՝ ՀՀ քրեական օրենսգրքի 112-րդ հոդվածի 1-ին մասով: Նրա նկատմամբ որպես խափանման միջոց է ընտրվել ստորագրություն չհեռանալու մասին:
Նախաքննությունը շարունակվում է: