Չնայած բարձր պետական պարտքին` Հայաստանի կառավարությունը պետք է շարունակի միջոցներ ձեռնարկել տնտեսությանն աջակցելու համար: Այս մասին Հայաստանի Ազգային ժողովի մշտական խորհրդարանական հանձնաժողովների համատեղ նիստին 2020 թվականի պետական բյուջեի կատարման տարեկան հաշվետվության նախնական քննարկման ժամանակ ասաց ՀՀ կենտրոնական բանկի ղեկավար Մարտին Գալստյանը:
Ըստ նրա՝ 2020 թվականին տնտեսության հակաճգնաժամային աջակցության ծավալը շուրջ 215 միլիարդ դրամ է կազմել: «Հարկային եկամուտները նախորդ տարվա համեմատ նվազել են 5.4 տոկոսով, սակայն` ոչ միայն տնտեսության կրճատման պատճառով, այլ նաեւ այն պատճառով, որ պետությունը, նույնիսկ ճգնաժամային պայմաններում, փորձեց հեշտացնել հարկերի վճարման ռեժիմը բիզնեսի համար: Մասնավորապես, անցյալ տարվա ամռանը բիզնեսն ազատվեց եկամտահարկի նախավճարից՝ 2020 թվականի երկրորդ եռամսյակի համար, եւ այն վճարեց միայն տարեվերջին: Այսինքն` վեց ամսվա տարկետում ստացավ»,- պարզաբանեց Կենտրոնական բանկի ղեկավարը:
Արդյունքում, ինչպես նշեց Գալստյանը, պարզվեց, որ տնտեսությանն աջակցելու պետական ծրագրերը ֆինանսական առումով 2.5 անգամ ավել են, քան նախկինում նախատեսված էր: Հաշվի առնելով այն, որ ճգնաժամի պայմաններում տնտեսությունը կրճատվել է, իսկ պետությունը լրացուցիչ միջոցներ է ծախսել բիզնեսին եւ քաղաքացիներին աջակցելու համար, պետական պարտքի հարաբերակցությունը ՀՆԱ-ի նկատմամբ, որը 2019-ի վերջին 49.9 տոկոս էր, այժմ հասել է 63.5 տոկոսի:
Իսկ այժմ, ըստ ՀՀ կենտրոնական բանկի նախագահի, կառավարությունը պետք է գործողությունների ծրագիր մշակի, որպեսզի հաջորդ 5 տարվա ընթացքում պարտքի մակարդակն իջնի 60 տոկոսից ցածր:
«ՀՀ կենտրոնական բանկը խոստովանում է, որ ներկայիս բացառիկ պայմաններում պետության քաղաքականությունը լեգիտիմ է, եւ, հետևաբար, պետք է շարունակվի այն աջակցությունը, որն այսօր ցուցաբերվում է»,- եզրափակեց Մարտին Գալստյանը:
