Նախագահ Թայիփ Էրդողանը Իրաքին նախազգուշացրել է, որ Թուրքիան մտադիր է «մաքրել» փախստականների ճամբարը, որը «անվտանգ ապաստան է քուրդ զինյալների համար»: Միեւնույն ժամանակ, նա սպառնում է երկարատեւ ռազմական արշավ իրականացնել Իրաքում:
Վերջին մեկ տարվա ընթացքում թուրքական ուժերը ակտիվորեն ներխուժում են Հյուսիսային Իրաք՝ Քրդական աշխատավորական կուսակցության դեմ պայքարի պատրվակով՝ արշավանքները կենտրոնացնելով հիմնականում Իրաքի ներսում մինչեւ 30 կմ տարածքով շերտի վրա:
Բայց Էրդողանն ասել է, որ Թուրքիայի սահմանից 180 կիլոմետր հարավ գտնվող «Մահմուր» ճամբարը, որը ավելի քան երկու տասնամյակ հյուրընկալել է հազարավոր փախստականների, զինյալների համար «ինկուբատոր» է եղել:
«Եթե ՄԱԿ-ը այն չհեռացնի, մենք դա կանենք որպես ՄԱԿ-ի անդամ»,- ասել է Էրդողանը` հավելելով, թե Անկարան կարծում է, որ «Մահմուրը» նույնքան մեծ սպառնալիք է, որքան ՔԱԿ-ի հենակետը Քանդիլ լեռներում:
Իրաքցի բարձրաստիճան մի պաշտոնյա Reuters-ին ասել է, որ անցյալ շաբաթ Թուրքիան Բաղդադին բողոքել է «ՔԱԿ-ի կողմից «Մահմուր» ճամբարից սկսված ահաբեկչական գործողություններից»:
Անվտանգության ծառայությունների հրամանատարները եւ տեղական պաշտոնյաները ուսումնասիրել են Թուրքիայի բողոքը եւ կառավարությանը հայտնել են, որ «Մահմուր» ճամբարը վերահսկվում է Քրդական աշխատավորական կուսակցության զինյալների կողմից, որոնք թույլ չեն տալիս կառավարական ուժերին մուտք գործել:
Ճամբարը հիմնադրվել է 1990-ականներին, երբ հազարավոր քրդեր փախան Թուրքիայից:
«Մահմուրը» մեկ տարի առաջ թուրքական ավիահարվածների էր ենթարկվել, չնայած այն ժամանակ զոհերի մասին չէր հաղորդվում: ««Մահմուրն» օգտագործվում է որպես Թուրքիայի կամ Թուրքիայի զինված ուժերի վրա հարձակման նյութատեխնիկական կենտրոններից մեկը»,- ասել է պաշտոնյան: «Եկել է այն ՔԱԿ-ից մաքրելու ժամանակը»:
