Լսելով Նիկոլ Փաշինյանի եւ Ռոբերտ Քոչարյանի գաղափարները՝ մտածում ես, թե ինչպես մի երկրում կարող են երկու այդպիսի տարբեր երեւույթներ լինել, իսկ առաջինը նույնիսկ համախոհներ ունի: Այս մասին հունիսի 2-ին լրագրողների հետ հանդիպմանը հայտարարեց ՀՅԴ ներկայացուցիչ Բագրատ Եսայանը:
Նման իրավիճակ Հայաստանում, ըստ նրա, նաեւ 1996-97 թվականներին էր: Երբ ընտրությունների կեղծումներից հետո թուլացավ առաջին նախագահ Լեւոն Տեր-Պետրոսյանի իշխանությունը:
Նա պարզաբանեց, որ երկրում կան լեւոնիզմ եւ նիկոլիզմ. Լեւոն Տեր-Պետրոսյանը կարծում է, որ «խաղաղություն» ցույց տալով մենք կարող ենք խաղաղ ապրել այս տարածաշրջանում, իսկ Նիկոլը լեւոնիզմի գաղափարական ժառանգությունն է:
«Երբ Լեւոն Տեր-Պետրոսյանն առաջարկ արեց երեք նախագահների դաշինք կազմելու մասին, այդ ժամանակ ազգային բեւեռն արդեն միավորվել էր: Նրանք հասկացան, որ եթե նիկոլիզմը եւ լեւոնիզմը չհանվեն Հայաստանից, մեր պետությունը գոյատեւելու շանս չի ունենա: Իր առաջարկով Տեր-Պետրոսյանը փորձեց պառակտել այս բեւեռը»,- հավելեց Եսայանը:
Նա պարզաբանեց, որ երբ պետությունը ծայրաստիճան թուլացած վիճակում է, դրանում սարսափելի իրադարձություններ են տեղի ունենում: Ըստ նրա՝ նույնն էլ հիմա է կատարվում:
ՀՅԴ ներկայացուցիչը նշեց, որ իրավապահ մարմիններ փաստացի չկան, նրանք բացառապես զբաղվում են Նիկոլ Փաշինյանի ֆիզիկական անվտանգության ապահովմամբ:
«Նրա կողմնակիցները հավատում են իշխանությունների կողմից բարձրաձայնված դավադրության տեսություններին: Օրինակ, հավատում են, որ հողերը վարձակալության էին տրվել 30 տարի առաջ, բայց Ալիեւը չգիտես ինչու չցանկացավ վերցնել դրանք: Բայց երբ Փաշինյանը եկավ, նա հանկարծ որոշեց վերցնել այդ հողերը: Տպավորություն է ստեղծվում, որ իշխանությունները ցանկանում են անհայտ կորած զինծառայողների հարազատներին կախվածության մեջ պահել իրենցից, որպեսզի նրանք հույսով ապրեն: Դա խոսում է այն մասին, որ ներկայիս ռեժիմն իր իշխանությունը պահելու համար կանգ չի առնում ոչ մի բանի առջեւ: Իսկ անհայտ կորած զինծառայողների ծնողները, ովքեր կարծում էին, որ ընդդիմությունը խանգարում է իրենց երեխաներին վերադարձնելուն, երեկ Երեւանում փակեցին փողոցները: Նրանք վերջապես հասկացան, թե ինչ են այս իշխանություններն իրենցից ներկայացնում»,- հավելեց Եսայանը:
Նա նշեց, որ դաշինքների եւ դիտորդական առաքելությունների ներկայացուցիչներն ամեն ինչ անելու են՝ ընտրություններին կեղծիքներ թույլ չտալու համար:
«Կեղծիքների դեպքում մարդիկ կկրեն ամենախիստ պատիժը: Մեր դաշինքը մեղադրվում է ընտրակաշառք բաժանելու մեջ: Սա, սակայն, ճիշտ չէ: Համոզված եմ, որ եթե Ոստիկանության եւ Ազգային անվտանգության ծառայության աշխատակիցները տեսնեն, որ Փաշինյանը փորձում է ապօրինի մնալ իշխանությունում, նրանք դուրս կգան եւ կպահանջեն նրա հրաժարականը»,- եզրափակեց Դաշնակցության ներկայացուցիչը:
