Հեռուստատեսության եւ ռադիոյի հանձնաժողովի գործողություններն անօրինական են ճանաչվել դատարանի հինգ որոշումներով: Այս մասին հունիսի 3-ին լրագրողների հետ հանդիպման ժամանակ ասաց Հայկական երկրորդ ալիքի փոխտնօրեն Լեւոն Սուլթանյանը:
Նա պարզաբանեց, որ 2019-ին Հանձնաժողովի որոշումները բողոքարկվել են եւ շահվել է երկու դատական գործ, իսկ մայիսի 26-ին հայտնվել է Վերաքննիչ դատարանի որոշումը, ըստ որի Հանձնաժողովի բողոքը մերժվել է: Այսինքն` եւս երկու որոշում է կայացվել հօգուտ ալիքի:
«Բացի այդ, այս տարվա հունվարին լիցենզիան ուժը կորցրած ճանաչելու հետ կապված մենք հիմնավորեցինք դրա անօրինականությունը: Ապրիլի 2-ին դատարանը անվավեր ճանաչեց հանձնաժողովի որոշումը` այն համարելով անօրինական»,- ասաց Սուլթանյանը:
Հեռուստաալիքի փոխտնօրենը հիշեցրեց, որ մայրաքաղաքային հեռարձակման մրցույթին հայտ ներկայացնելու վերջնաժամկետն ապրիլի 5-ն էր, եւ վաղը հայտնի կդառնան մրցույթի արդյունքները:
«Նախորդ մրցույթի ժամանակ, երբ մեր դիմումը չհաստատեցին, Հայաստանի հանրային հեռուստատեսությունը չգիտես ինչու հետ կանչեց հայտը մինչ մրցույթի ավարտը, իսկ այժմ, երբ մենք կրկին դիմեցինք մրցույթի վերջին օրը (ապրիլի 5-ին), մի քանի ժամ անց ՀՌՀ-ն հայտ ներկայացրեց: Դրանից հետո` ապրիլի 15-ին, Հայաստանի կառավարությունը որոշում կայացրեց, համաձայն որի ՀՌՀ-ին 427.7 միլիոն դրամ է հատկացվել մայրաքաղաքային հեռարձակման լրատվական ալիք ստեղծելու համար: Այսինքն կառավարությունը, առանց հանձնաժողովի որոշմանը սպասելու, արդեն որոշում է կայացրել, որ ՀՌՀ-ն պետք է մայրաքաղաքային հեռարձակման ալիք ստեղծի: Ապրիլի 23-ին եւ 30-ին մենք նամակներ ստացանք այն մասին, որ 3-4 վարույթ է հարուցվել, եւ Հեռուստատեսության եւ ռադիոյի հանձնաժողովն ապրիլի 23-ից 27-ն ամեն մոնիտորինգ է իրականացրել: Բացի այդ, մեզ հայտնի դարձավ, որ ՀՌՀ-ի ղեկավար Տիգրան Հակոբյանը փորձում է ճնշում գործադրել դրա անդամների վրա, որպեսզի նրանք վաղվա քվեարկության ժամանակ նախապատվությունը տան ՀՌՀ-ին: Այս ամենը կասկած է հարուցում»,- հավելեց նա:
Սուլթանյանը հանձնաժողովի անդամներին հորդորեց չտրվել ճնշումներին եւ կրկին ապօրինի գործողությունների չգնալ: «Մենք պատրաստ ենք պաշտպանել յուրաքանչյուրին, ով օրինական որոշում կկայացնի եւ նրանց վրա ճնշում կգործադրվի, բայց կհասնենք նրանց պատժին, ով անօրինական գործողությունների կգնա: Մենք գործ ունենք ոչ թե քաղաքական հետապնդման, այլ հանձնաժողովի կողմից պարտված դատական գործերի համար հաշվեհարդար տեսնելու փորձի հետ»,- բացատրեց նա:
Փաստաբան Սիմոն Բաբայանն իր հերթին հավելեց, որ մրցույթն անցկացվել է բազմաթիվ խախտումներով, Հանձնաժողովն անտեսել է ՄԻԵԴ-ի կողմից 2008 թվականին կատարված իրավական գնահատականները («Ա1+»-ի գործ)` պարզաբանելով, որ որոշումները հիմնավորված չէին:
Նա նշեց, որ, ըստ էության, անհավասար մրցակցային իրավիճակ է ստեղծվել, քանի որ մի կողմից կա պետական բյուջեից ֆինանսավորվող պետական ալիք եւ Հանձնաժողով, որն ունի պետական կարգավիճակ, մյուս կողմից՝ մասնավոր ալիք:
