Անցած շաբաթ Թուրքիայի նախագահ Ռեջեփ Թայիփ Էրդողանի քաղաքական հայտարարությունն ընդգծել է երկրի շուկաների վտանգավոր վիճակը, հաղորդում է Bloomberg-ը:
Այս տարի թուրքական լիրայի արժեթղթերը կորցրել են իրենց արժեքի շուրջ 20 տոկոսը, մինչդեռ բաժնետոմսերի օտարերկրյա սեփականությունը հասել է աննախադեպ նվազագույնի, իսկ ներդրողների վստահությունը «քայքայվել է»:
«Քաղաքական սխալների ռիսկն աճել է այնքան, որ այն ծածկում է ցանկացած այլ ներդրումային հիմնավորումները»,- Bloomberg-ը մեջբերում է Լոնդոնի Aberdeen Asset Management ընկերությունից Վիկտոր Սաբոյի խոսքերը. ընկերությունը վերջերս դուրս է եկել Թուրքիայում արժեթղթերի եւ տարադրամի տեղական շուկաներից:
Bloomberg գործակալության հաղորդմամբ՝ ներդրողների համար որոշիչ էր Էրդողանի կողմից ԿԲ ղեկավար Նաջի Ագբալի հեռացումն այն ժամանակ, երբ Ագբալը բարձրացրել էր տոկոսադրույքները, որին Թուրքիայի նախագահը հավանություն չէր տվել: Այդ օրվանից Թուրքիայի շուկաներում անկում է նկատվում:
Լիրայի յուրաքանչյուր նոր անկայունությունը հանգեցնում է փոխարժեքի հետագա անկմանը, իսկ խոչընդոտները, որոնք խանգարում են ներդրողներին պահել պարտքը թուրքական դոլարում, ավելանում են, Bloomberg գործակալությանը հայտարարել է Լոնդոնի Fidelity International հիմնադրամի կառավարիչ Փոլ Գրիրը: