Լատվիայի պաշտպանության նախարար Արթիս Պաբրիկսը այցելել է Անկարայի մերձակայքում գտնվող անօդաչու թռչող սարքերի արտադրության կենտրոն: Այս մասին Twitter-ում հայտնել է թուրքական անօդաչուների արտադրող Baykar- ը:
Պաբրիկսը այցելել է «Բայկար» ընկերությանը պատկանող կենտրոն եւ հանդիպել է ընկերության ներկայացուցիչների, այդ թվում՝ նաեւ նրա գործադիր տնօրեն Հալուկ Բայրաքթարի հետ: Իր այցից հետո Պաբրիկսը բարձր է գնահատել Թուրքիայի պաշտպանական արդյունաբերության աշխատանքը եւ նրա ներդրումը ՆԱՏՕ-ում: «Թուրքական արդյունաբերությունը, հետազոտությունն ու զարգացումը համապատասխանում են ամենաբարձր միջազգային չափանիշներին, եւ որպես ՆԱՏՕ-ի դաշնակիցներ, մենք դա շատ ենք գնահատում: Բոլորիդ հաջողություն եմ մաղթում»- գրել է Պաբրիկսը Twitter-ում:
Պաբրիկսի այցը լուրեր է տարածել, որ Լատվիան կարող է դառնալ ՆԱՏՕ-ի եւ Եվրամիության հաջորդ անդամ երկիրը, որը Լեհաստանից հետո անօդաչու թռչող սարքեր կգնի Թուրքիայից, գրում է Ahval-ը:
Մեկ այլ օգտատիրոջ հետ Twitter-ում նամակագրության ժամանակ Պաբրիկսին հարցրել են, թե երբ է Լատվիան ձեռք բերելու Bayraktar անօդաչու թռչող սարքեր: Պաբրիկսը պարզապես պատասխանել է. «Հուսով եմ՝ շուտով»:
Լատվիայից պաշտոնական հայտարարություն չի եղել, որ պատրաստվում է մարտական անօդաչու թռչող սարքեր գնել Թուրքիայից, բայց իր այցից հետո Պաբրիկսը Facebook-ում գրել է, որ Թուրքիայի հետ պաշտպանության ոլորտում համագործակցության խորացումը բխում է Լատվիայի ազգային շահերից: Նա հավելել է, որ դա հատկապես կարեւոր է այն բանի համար, որ, ըստ նրա, Լատվիան ներկայումս կենտրոնացած է անօդաչու թռչող սարքերի տեխնոլոգիայի վրա:
«Լատվիայի շահերից է բխում փոխադարձ կարեւոր հարցերի շուրջ կառուցողական համագործակցության խթանումը Թուրքիայի եւ նրա ռազմական արդյունաբերության հետ: Թուրքիան ՆԱՏՕ-ի մեր գործընկերն է, եւ ես վստահ եմ, որ մեր համատեղ համագործակցությունը կօգնի ամրապնդել ինչպես Լատվիայի, այնպես էլ մեր տեղական ռազմական արդյունաբերության պաշտպանական ներուժը»,- գրել է Պաբրիկսը Facebook-ում: «Անօդաչու թռչող սարքերն այն թեման են, որոնց վրա մենք ներկայումս մեծ ուշադրություն ենք դարձնում եւ դարձնելու ենք: Անօդաչու սարքերի համակարգերը Լատվիայի համար ստեղծում են բազմաթիվ լրացուցիչ հնարավորություններ, եւ դա մեզ հնարավորություն կտա իսկապես բարձրացնել մեր մարտունակությունը»:
