Ռուսաստանի եւ Չինաստանի առավել ակտիվ համագործակցությունը քաղաքական եւ ռազմական ոլորտներում լուրջ մարտահրավեր է ՆԱՏՕ-ին, կարծում է դաշինքի գլխավոր քարտուղար Ենս Սթոլտենբերգը, տեղեկացնում է ՌԻԱ «Նովոստի»-ն։

«Վերջին ժամանակներս Ռուսաստանը եւ Չինաստանն ավելի սերտ համագործակցություն են հաստատում ինչպես քաղաքական, այնպես էլ ռազմական մակարդակով։ Խոսքը նոր չափման եւ ՆԱՏՕ-ի համար լուրջ մարտահրավերի մասին է։ Դրա արդյունքում ծագում են նոր վտանգներ։ Մոսկվան եւ Պեկինը ավելի հաճախ են համակարգում համապատասխան դիրքերը որոշումների վերաբերյալ՝  բազմակողմ կազմակերպությունների շրջանակում, ինչպիսին ՄԱԿ-ն է»,- ասել է ՆԱՏՕ գլխավոր քարտուղարը երեքշաբթի Հռոմի la Repubblica թերթում «Ռուսաստանը եւ Չինաստանը սպառնում են Արեւմուտքին» վերնագրով հրապարակված հարցազրույցում։

«Բացի այդ, նրանք համատեղ զորավարժություններ են անցկացնում, միասին փորձարկում մարտական ինքնաթիռներ՝ հեռահար թռիչքներով, եւ ծովային գործողություններ, ինչպես նաեւ փորձի ինտենսիվ փոխանակում են կատարում սպառազինությունների համակարգերի եւ ինտերնետի վերահսկման գծով»,- ասել է նա։

Սթոլտենբերգի խոսքով՝ Հյուսիսատլանտյան դաշինքը պետք է «ադապտացվի գլոբալ անվտանգության համատեքստին, որն էլ ավելի մրցակցային է դառնում»։ «Մենք ապրում ենք համակարգերի միջեւ գլոբալ մրցակցության դարաշրջանում»,- ընդգծել է նա։

Սթոլտենբերգը միաժամանակ վստահություն է հայտնել, որ ՆԱՏՕ դաշինքը կարող է պատասխան տալ ժամանակի նոր մարտահրավերներին։ «Նրա հաջողությունը կապված է փոփոխվող աշխարհին ադապտացվելու կարողության հետ։ Այդպես էր սառը պատերազմի ավարտից հետո, սեպտեմբերի 11-ի ահաբեկչական գործողություններից եւ Ռուսաստանի կողմից Ղրիմի անօրինական անեքսիայից հետո։ Այդ ժամանակվանից առաջ են եկել նոր սպառնալիքներ, որոնց մենք, իհարկե, կարձագանքենք»,- ասել է գլխավոր քարտուղարը։