Ատլանտիկայի հարթ կետերը փոքրացել են չափերով՝ մարդածին եւ մի շարք այլ գործոններով պայմանավորված: Այս եզրակացությանն են հանգել ԱՄՆ եւ Մեծ Բրիտանիայի հետազոտողները, որոնք վերլուծել են կետերի չափերի փոքրացման պատճառները, հայտնել է Planet-today-ը:
Վերջին երկու տասնամյակների ընթացքում հյուսիսային երիտասարդ հարթ կետերի մարմնի երկարությունը նվազել է մոտ մեկ մետրով: Հայտնի է, որ համեմատաբար ոչ վաղ անցյալում այս ծովային կաթնասուները եղել են միջինը տասնչորս մետր, իսկ այժմ՝ հիմնականում տասներեք մետր:
«Կետերի փոքրացման հիմնական պատճառը սթրեսն է, որը առաջացնում է մարդկային ներկայությունից: Կետերը տառապում են նավերի առաջացրած աղմուկից. բացի այդ, հաճախ խճճվում են ձկնորսների ցանցերում: Կլիմայական փոփոխությունների պատճառով կետերի համար ավելի քիչ զոոպլանկտոն է հասանելի, եւ դա ուղղակիորեն արտացոլվում է դրանց չափերի վրա», - ասում են հետազոտության հեղինակները:
Նոր Անգլիայի Ակվարիումի ավագ հետազոտող Էմի Նոուլթոնը նշել է, որ 356 կետ է մնացել Հյուսիսային Ատլանտիկայի ջրերում: Տասը տարի առաջ դրանք ավելի քան 500-ն էին: Ենթադրվում է, որ հյուսիսային հարթ կետերի մարմնի երկարության նվազումը վկայում է պոպուլյացիայի հետագա կրճատման մասին, քանի որ մարմնի փոքրացած չափը կարող է բացասաբար ազդել էգերի վերարտադրողական ֆունկցիայի, ինչպես նաեւ ձագերին կերակրելու կարողության վրա:
