ԱՄՆ վարչակազմը կարծում է, որ Ուկրաինան արդեն ունի բոլոր գործիքները ՆԱՏՕ-ին միանալու համար: Այս մասին հայտարարել է ԱՄՆ պետքարտուղար Էնթոնի Բլինքենը, հաղորդում է ՌԲԿ-ը:
«Մենք աջակցում ենք ՆԱՏՕ-ում Ուկրաինայի անդամակցությանը: Այժմ Ուկրաինան ունի բոլոր պահանջվող գործիքները դաշինքին միանալու համար»,-հայտարարել է նա:
Բլինքենի խոսքով՝ ՆԱՏՕ-ին անդամակցելու հարցով գործողությունների ծրագրի ստեղծման պահից մշակվել են մի շարք կարեւոր գործիքներ:
«Այդ ծրագիրը պետք է մշակվի ՆԱՏՕ-ի անդամ բոլոր երկրների կոնսենսուսի միջոցով: Կարծում եմ՝ դաշինքի որոշ երկրներ այժմ այդ ծրագրին աջակցում են ավելի քիչ, քան մյուսները»,-նշել է Բլինքենը:
Ավելի վաղ հունիսի 7-ին Ուկրաինայի նախագահ Վլադիմիր Զելենսկին Axios-ին տված հարցազրույցում հայտարարել է, որ ՆԱՏՕ-ն իսկապես ցանկանում է Ուկրաինայի անդամակցությունը դաշինքին, եւ որ դաշինքի անդամ երկրները պետք է անհապաղ լուծեն այդ հարցը, քանի որ երկիրը վտանգի տակ է գտնվում: