ՀՀ նախկին իշխանությունը չէր ճանաչում Ղարաբաղը միայն նրա համար, որպեսզի դուրս չգար բանակցային գործընթացից եւ հարցը լուծեր խաղաղ ճանապարհով: Այս մասին Վլադիմիր Սոլովյովին տված հարցազրույցում ասել է «Պատիվ ունեմ» դաշինքի առաջնորդ, ՀՀ ԱԱԾ նախկին պետ Արթուր Վանեցյանը:
«Կար ծրագիր, որ եթե Ադրբեջանը ռազմական գործողություններ սկսի, եւ դրանք մի քանի օր շարունակվեն, պետք է անմիջապես ճանաչել Ղարաբաղը: Նիկոլ Փաշինյանը, ես նրան այլեւս անունով չեմ կոչի, ավելի հայտնի որպես կապիտուլյանտ, իր մեջ ուժ կամ գրագիտություն չգտավ կամ էլ հատուկ ոչինչ չարեց եւ չճանաչեց Ղարաբաղը: Ռուսաստանին պետք չէ մեղադրել: Ռուսաստանն իսկապես օգնեց»,-ասել է Վանեցյանը:
Նրա խոսքով՝ Հայաստանի իշխանությունը 3 տարի է՝ փչացնում է Ռուսաստանի հետ հարաբերությունները:
«Հիշեք կապիտուլյանտի պոպուլիստական հայտարարություններն ու հրամանները: Ռուսաստանն օգնեց եւ շարունակում է օգնել: Այսօր Արցախում մարդիկ ապրում են ռուս խաղաղապահների պաշտպանության ներքո, չպետք է դա մոռանալ»,-հիշեցրել է Վանեցյանը:
Նա հիշեցրել է հայկական կողմի սարսափելի կորուստների մասին՝ Արցախի տարածքի 75 տոկոսի կորուստ, գրեթե 5000 զոհ, բազմաթիվ փախստականներ:
«Իշխանությունը ցանկանում է փակել Ղարաբաղի թեման: Նրանց կարծիքով՝ հարցը կարգավորված է, պատերազմ չի լինի, բանակ չի լինի, կապրենք եւ կբարգավաճենք, սակայն ինչպե՞ս»,-նկատել է Վանեցյանը:
«Հանձնվել Թուրքիային»,-ենթադրել է Սոլովյովը:
«1915 թվականին հիշենք թուրքական յաթաղանը, 2020-ին փոխարինվեց «Բայրաքթար»-ով: Թուրքիան միշտ հայ ժողովրդին ոչնչացնելու նպատակ է ունեցել»,-հավելել է Վանեցյանը:
