«Սինալոա» թմրակարտելի նախկին առաջնորդ Խոակին Գուզմանի կինը` Էմմա Կորոնել Աիսպուրոն, մտադիր է ամերիկյան դատարանում խոստովանել, որ մասնակցել է իր ամուսնու հանցագործություններին, հայտնում է ՏԱՍՍ-ը` վկայակոչելով The New York Times-ը:
Պարբերականի աղբյուրների համաձայն` Աիսպուրոն, ով փետրվարին ձերբակալվել էր Վիրջինիա նահանգում թմրանյութերի ապօրինի շրջանառության մեջ ներգրավվածության մեղադրանքով, հետաքննության հետ գործարքի է համաձայնել: ԱՄՆ-ի եւ Մեքսիկայի քաղաքացին հինգշաբթի Վաշինգտոնի Դաշնային շրջանի դատարանում կայանալիք նիստին մտադիր է պատմել, որ օգնել է իր ամուսնուն ղեկավարել թմրանյութերի կարտելը, ինչպես նաեւ` փախնել բանտից:
Թերթի տվյալներով` ԱՄՆ դատախազության հետ գործարքն Աիսպուրոյին չի պարտավորեցնում օգնել հետաքննությանը: ԱՄՆ-ում առաջադրված մեղադրանքով նրան կարող է մինչեւ 10 տարի ազատազրկում սպառնալ: Ակնկալվում է, որ ԱՄՆ իշխանությունները պատրաստ կլինեն էականորեն մեղմացնել պատժաչափը` Աիսպուրոյի կողմից իր մեղքի խոստովանության դիմաց: