Ֆրանսիան հայտարարել է, որ ամեն ինչ կանի որպեսզի էլեկտրոնային առեւտրի հսկա Amazon-ը ենթարկվի G7-ի կողմից հաստատված նվազագույն համաշխարհային հարկի, հաղորդում է Reuters-ը:
Ըստ ծրագրի՝ երկրներին թույլատրվում է առնվազն 15 տոկոս դրույքաչափով հարկել աշխարհի ամենաեկամտաբեր ընկերությունների շահույթի մի մասը՝ անկախ դրանց գտնվելու վայրից:
Սակայն դա վերաբերում է միայն այն ընկերություններին, որոնց շահույթը անցնում է 10 տոկոսը: Չնայած Amazon-ի վիթխարի ներկայությանը եւ 1 տրիլիոն դոլարից ավելի շուկայական շեմին, անցյալ տարի նրա շահույթի մարժան ընդամենը 6,3 տոկոս է եղել, ինչը շատ ցածր է այդ շեմից:
Բայց Ֆրանսիայի ֆինանսների նախարար Բրունո Լե Մերը RMC-ին ասել է, որ հարկային բարեփոխումները «պետք է կիրառվեն Amazon-ի հանդեպ»: «Ֆրանսիան կպայքարի, որ դա տեղի ունենա»։
Հարկային բարեփոխումները քննարկվել են Տնտեսական համագործակցության եւ զարգացման կազմակերպությունում` հատուկ նպատակ ունենալով բոլոր թվային հսկաներին վճարել իրենց արդար բաժինը: «Amazon-ի խնդիրն այն է, որ նրա որոշ ձեռնարկություններ 10 տոկոսից ավելի շահույթ չեն ստանում»,- ասել է Լե Մերը: Մինչդեռ, նրա խոսքով, Amazon-ի ամպային ծառայությունները «շատ մեծ» մարժա ունի:
Լե Մերը խոստովանել է, որ նախքան աշխարհը կկարողանա մի քանի թվային հարկային ռեժիմ կիրառել, մի քանի խոչընդոտներ է անհրաժեշտ հաղթահարել: Նախ` պահանջվում է Չինաստանի համաձայնությունը: «Հավատացեք ինձ, դա բոլորովին այլ խաղ կլինի»,- ասել է Լե Մերը:
Մեկ այլ օրինակ է եվրոպական որոշ երկրների հարկման 15 տոկոսանոց դրույքաչափից անցնելու հույսը, որն, ըստ Լե Մերի, իրենից ընդամենը «նվազագույն դրույքաչափ» է ներկայացնում: Վերջին խնդիրն է համոզվել, որ «բոլոր թվային հսկաները, առանց բացառության, ենթակա են այդ հարկմանը»:
