Իսրայելական ընկերությունը Սաուդյան Արաբիային վաճառել է հարձակողական տեխնոլոգիա, որը կոտրում է սմարթֆոնները եւ դրանք վերածում լրտեսական սարքերի, հայտնում է Haaretz-ը:
Հաղորդվում է, որ Quadream ընկերությունը Սաուդյան Արաբիայի կառավարությանը վաճառել է Reign անունով ծրագիր, որը նրանց թույլ է տալիս կոտրել հեռախոսները, տվյալներ կորզել եւ դրանք հետեւող սարքերի վերածել:
Reign-ը հեռախոսի սեփականատիրոջից չի պահանջում սեղմել վնասակար հղմանը, որպեսզի կարողանա սարքը կոտրել, եւ հնարավորություն ունենա գաղտնալսել միկրոֆոնի միջոցով, վերցնել պահպանված հաղորդագրությունները, լուսանկարները, տեսանյութերը ու էլփոստերը եւ գործարկել հեռախոսի նավիգացիան՝ արդյունավետորեն այն վերածելով հետեւող սարքի:
Ըստ Haaretz-ի, Reign-ը վաճառվում է InReach Technologies-ին՝ Կիպրոսում գտնվող Quadream-ի դուստր-ձեռնարկությանը, իսկ Quadream-ը իր հետազոտություններն ու մշակումները ղեկավարում է Թել Ավիվի Ռամատ Գանի շրջանում գտնվող գրասենյակից:
Quadream-ը հիմնադրվել է 2016-ին՝ կիբեռանվտանգության ոլորտում աշխատանքի փորձ ունեցող երեք իսրայելցիների կողմից, որոնցից մեկն աշխատում էր իսրայելական ռազմական հետախուզության համար: Ընկերությունը ներկայացված չէ համացանցում եւ իր գրասենյակի դռներին տարբերանշան չի տեղադրում:
ԿԻպրոսում նրա InReach Technologies առեւտրային հարթակը, ըստ Haaretz-ի, կարող է օգտագործվել պաշտպանական արդյունաբերության իսրայելական արտահանման կարգավորիչի տեսադաշտից հեռու մնալու համար:
Զրոյական սեղմման տեխնոլոգիայի միջոցով հեռախոսներ կոտրելու Reign-ի հնարավորությունը նման է Pegasus լրտեսական ծրագրին, որը մշակվել է Իսրայելի խոշորագույն NSO Group ընկերության կողմից եւ նույնպես վաճառվել է Սաուդյան Արաբիային:
Իսրայելական մի քանի ընկերություններ, որոնց հիմնադիրներից եւ աշխատակիցներից շատերը հետախուզությունից եւ պաշտպանությունից են, մշակել են բջջային հեռախոսներ կոտրելու եւ լրտեսման տեխնոլոգիաներ: Հաղորդվում է, որ իսրայելական լրտեսական տեխնոլոգիաները վաճառվել են մի քանի արաբական կառավարությունների, այդ թվում՝ ԱՄԷ-ին, Բահրեյնին եւ Մարոկկոյին, որոնք այն օգտագործել են լրագրողներին եւ ակտիվիստներին լրտեսելու համար: