Հունիսի 20-ին Հայաստանում կանցկացվեն երկրի պատմության մեջ երկրորդ արտահերթ խորհրդարանական ընտրությունները: Համաձայն Gallup International-ի վերջին հարցման՝ «Հայաստան» դաշինքի առաջնորդ, ՀՀ երկրորդ նախագահ Ռոբերտ Քոչարյանը շարունակում է հայտնիություն ձեռք բերել:
Դա հերթական անգամ հաստատում է, որ հայ հասարակության մեջ աճում է Նիկոլ Փաշինյանի կառավարության նկատմամբ անվստահությունը, ինչը նշանակում է, որ Քոչարյանն ու նրա կոալիցիան այլեւս մրցակիցներ չունեն: Ընտրությունները կարող են լարված քաղաքական սեզոնի ավարտը դառնալ:
«Lenta.ru»-ն փորձել է հասկանալ՝ ինչպես կփոխվեն Հայաստանի եւ Ռուսաստանի հարաբերությունները Քոչարյանի հաղթանակի դեպքում:
Բազմավեկտորության ավարտը
Պատերազմում պարտությունից եւ ձգձգված քաղաքական ճգնաժամից հետո Հայաստանը փորձում է կարգավորել իրավիճակը արտահերթ ընտրությունների միջոցով: Ընտրությունները կկայանան հունիսի 20-ին: Նախընտրական քարոզարշավը սկսվել է երկուշաբթի՝ հունիսի 7-ին: Պայքարում են 26 կուսակցություն եւ դաշինք:
Առաջին օրերից հայտնի դարձավ, որ վարչապետի գլխավոր թեկնածուն Ռոբերտ Քոչարյանն է:
Քոչարյանի կարծիքով՝ Փաշինյանի կառավարությունն ունակ չէ գնահատել երկրի վիճակն ու հարաբերություններ կառուցել դաշնակիցների հետ միջազգային հարթակում: Քոչարյանն ու նրա աջակիցները բացահայտ հասկացրել են, որ Ռուսաստանը ներկայիս պայմաններում պետք է լինի Հայաստանի առանցքային գործընկերը, ինչպես եղել է մինչ 2018 թվականը:
Դրա ապացույցներից է ընտրությունների նախաշեմին Ռուսաստանի նախագահ Վլադիմիր Պուտինի եւ Ռոբերտ Քոչարյանի հեռախոսազրույցը: Կրեմլը նախընտրում է գործ ունենալ ուժեղ եւ համակարգային խաղացողների հետ: Այն դեպքում, երբ գործող վարչապետ Նիկոլ Փաշինյանը, ով իշխանության եկավ «թավշյա հեղափոխությունից» հետո, չկարողացավ իրեն ներկայացնել ռուս գործընկերների մոտ:
Իշխանության գալուց հետո Փաշինյանը Ռուսաստանը մղեց երկրորդ պլան: Առաջին տեղում հայտնվեց ՆԱՏՕ-ի եւ նույնիսկ Թուրքիայի հետ սիրախաղը:
Այդպիսի պահվածքն աջակցություն չստացավ ո՛չ Մոսկվայում, ո՛չ Երեւանում, ո՛չ հայկական սփյուռքում: Իրավիճակը խորացավ այնքան, որ Հայաստանը կորցրեց Ռուսաստանին որպես արտաքին քաղաքականության հարթակում առանցքային գործընկեր՝ ձեռք չբերելով լուրջ դաշնակիցների ի դեմս Եվրամիության եւ ԱՄՆ-ի:
Ուժեղ բանակ՝ ամուր խաղաղություն
Ռուսաստանի հետ գործընկերային հարաբերությունները կարեւոր են ռազմական դիրքերի ամրապնդման տեսանկյունից: Ռազմարդյունաբերական համալիրի զարգացման մասին, որը տնտեսական բարեփոխումների լոկոմոտիվ կարող է դառնալ, Քոչարյանը խոսել է բազմիցս:
Ընդ որում, նա իրատեսական է համարում Սյունիքում ռուսական ռազմաբազայի ստեղծումը: Սակայն, ըստ Քոչարյանի, պետք է մարտունակ զինված ուժեր ունենալ:
Ռուսաստանի հետ հարաբերությունները կարող են զարգանալ նաեւ այլ ուղղություններով: Վերջին օրերին Արագածոտնի մարզում բնակիչների հետ հանդիպման ժամանակ Քոչարյանը կրկին հայտարարեց ռուսական դերի եւ Հայաստանի արդյունաբերության վրա Ռուսաստանի ազդեցության մասին:
«Հայաստան» դաշինքի ծրագրում խոսվում է առնվազն երեք ճյուղերի զարգացման մասին: Դա ճանապարհների կառուցումն է, ագրարային ոլորտն ու ռուսական շուկաներ հայկական արտադրանքի արտահանումը եւ առողջապահությունը:
Քոչարյանի հաղթանակի դեպքում Ռուսաստանը կարող է տարածաշրջանում ստանալ հավատարիմ դաշանկից ի դեմս Հայաստանի:
Այնուամենայնիվ, վերջնական պատասխանը կտան արտահերթ խորհրդարանական ընտրությունները: Հայաստանը շարունակում է փորձությունների միջով անցնել, իսկ դա նշանակում է, որ ընտրություններում հաղթողը պետք է երկիրը հանի ճգնաժամից, որը թույլ կտա լուծել բազմաթիվ խնդիրներ, այդ թվում՝ Լեռնային Ղարաբաղում պատերազմի ավարտի եւ հայ-ռուսական հարաբերությունների կառուցման հետ կապված:
