ՀՀ երկրորդ նախագահ Ռոբերտ Քոչարյանը դուրս թողեց Ղարաբաղը բանակցություններից, իսկ Փաշինյանը՝ Հայաստանը: Այս մասին այսօր՝ հունիսի 10-ին, մամուլի ասուլիսի ժամանակ հայտարարեց ՀՀ առաջին նախագահ, վարչապետի թեկնածու Լեւոն Տեր-Պետրոսյանը:
Նա նկատեց, որ 2020 թվականի պատերազմից հետո Հայաստանի կարծիքը ոչ ոք հաշվի չի առնում:
«Հայաստանը չի կարող ԼՂ հարցով ինքնուրույն որոշում կայացնել: Դա ավելի ծանր հետեւանք է, քան պատերազմը: Մենք այլեւս այդ հարցով խաղացողներ չենք»,-ասաց Տեր-Պետրոսյանը:
Առաջին նախագահը հիշեցրեց, որ 1990-ական թվականներին ԼՂ հարցով փորձագիտական մակարդակով հայկական կողմից ներկայացված էին 6 մարդ՝ ինքը, Ռոբերտ Քոչարյանը, Արկադի Ղուկասյանը, Վարդան Ոսկանյանը, Ալեքսանդր Արզումանյանը, Վազգեն Սարգսյանը, Ռուսաստանից՝ Կազիմիրովը, ԱՄՆ-ից՝ մեկ մարդ:
«Այժմ նման մարդիկ քիչ են: Նիկոլ Փաշինյանը մինչ օրս չհասկացավ ղարաբաղյան հարցը: Երկրների առաջնորդները խոսում են նրա հետ, սակայն նա ոչինչ չի հասկանում: Ես հակված եմ հավատալու, որ նա չի հասկանում»,-նշեց նա:
Տեր-Պետրոսյանը կրկնեց այն թեզը, որ 1996-1997 թվականներից հետո ուժերի հավասարակշռությունը փոխվել է հօգուտ Ադրբեջանի:
«Այդ պատճառով 2017 թվականին ես փորձում էի անել ամեն ինչ, որպեսզի Սերժ Սարգսյանը գնա կոնֆլիկտի լուծման:Կար «Լավրովի պլան»: Այդ ժամանակ Իլհամ Ալիեւ դադարեց դիմակայել: Սակայն մենք բաց թողեցինք ժամանակը եւ ոչինչ չարեցինք: Սերժ Սարգսյանը պետք է ստորագրեր «Լավրովի պլանը»»,-նշեց առաջին նախագահը: