Մոսկվան ակնկալում է, որ եռակողմ աշխատանքային խումբը շուտով կվերսկսի իր գործունեությունը՝ պայմանավորվածությունների համաձայն: Այս մասին հայտարարել է ՌԴ ԱԳՆ պաշտոնական ներկայացուցիչ Մարիա Զախարովան:
«Հարավային Կովկասում տրանսպորտային եւ տնտեսական կապերի ապաշրջափակումը հիմնականում գերակա խնդիր է, որի իրականացման համար շահագրգիռ են տարածաշրջանի բոլոր երկրները, այդ թվում` Հայաստանը, Ադրբեջանը, Ռուսաստանը»,- նշել է նա` հիշեցնելով, որ երեք երկրների փոխվարչապետների մակարդակով ստեղծվել է աշխատանքային խումբ:
«Երեք երկրների ոլորտային փորձագետները կատարել են փորձագիտական վերլուծություն, որն անհրաժեշտ է հաղորդակցությունները վերականգնելու միջոցներ ձեռնարկելու համար, ինչը սկզբունքորեն թույլ է տալիս մոտ ապագայում անցնել ենթակառուցվածքային համատեղ նախագծերի փուլային իրականացմանը: Ակնկալում ենք, որ եռակողմ աշխատանքային խումբը առաջիկայում կվերսկսի իր գործունեությունը՝ պայմանավորվածությունների համաձայն:
Միեւնույն ժամանակ, հայ-ադրբեջանական սահմանի որոշ հատվածներում միջադեպերն, իհարկե, չեն նպաստում Երեւանի եւ Բաքվի հարաբերությունների ընդհանուր ֆոնի կարգավորմանը: Մենք կողմերին զսպվածության, լարվածության դեէսկալացիայի եւ հակասությունները բացառապես խաղաղ բանակցությունների միջոցով լուծելու կոչ ենք անում»,- ասել է նա:
