2021 թվականին 5 ամսում միգրացիայի բացասական սալդոն կազմել է 90 հազար մարդ: Այս մասին այսօր՝ հունիսի 11-ին, Եղվարդում նախընտրական քարոզարշավի ժամանակ հայտարարեց «Հայաստան» դաշինքից վարչապետի թեկնածու, ՀՀ երկրորդ նախագահ Ռոբերտ Քոչարյանը:
Նրա խոսքով՝ դա երեք երկարատեւ ճնգաժամերի արդյունք է՝ անվտանգություն, տնտեսական ճգնաժամ (ՀՆԱ անկում, գործազրկության աճ եւ այլն) եւ ներքաղաքական ճգնաժամ:
Նա հավելեց, որ դա Հայաստանի համար աննախադեպ իրավիճակ է, եւ այսօր բոլոր ճգնաժամները ստեղծվել են արհեստականորեն իշխանության սխալ քաղաքականության արդյունքում:
«Եթե չլիներ այս իրավիճակը, պատերազմում պարտություն չէր լինի: Այդ ճգնաժամների նույնիսկ մեկն է բավարար, որպեսզի արտահերթ ընտրություններ անցկացվեն: Հայաստանում այդ երեք ճգնաժամները երբեք միասին չեն եղել: 1996 թվականին եղել է ներքաղաքական ճգնաժամ, սակայն անվտանգության ճգնաժամ չի եղել , իսկ տնտեսությունը դանդաղ, բայց զարգանում էր: 1998 թվականին եղել է ԼՂ հարցի շուրջ ճգնաժամ, սակայն անվտանգության ճգնաժամ չի եղել: Այսօրվա իշխանությունն է պատասխանատու այդ իրավիճակի համար »,-նշեց երկրորդ նախագահը:
Նա պարզաբանեց, որ իրենց քաղաքական ուժը մտադիր է վերականգնել երկրի անվտանգությունը, ապահովել տնտեսական աճ եւ հանդարտեցնել ներքաղաքական վիճակը:
