«Գույք պարտքի դիմաց» գործընթացը կապ չունի ո՛չ ՀԱԷԿ-ի, ո՛չ երկաթուղու հետ: Այս մասին Չարենցավանում նախընտրական քարոզարշավի ժամանակ հայտարարեց «Հայաստան» դաշինքից վարչապետի թեկնածու, ՀՀ երկրորդ նախագահ Ռոբերտ Քոչարյանը:
Նա հիշեցրեց, որ այդ գործընթացի արդյունքում հաջողվել է ներգրավել 100 մլն դոլարի չափով ներդրում:
Այդ ձեռնարկությունները պահպանվում են եւ հարկ են վճարում: Բացի այդ, նոր աշխատատեղեր են ստեղծվել:
«Երկրորդ նման գործարքը «Իրան-Հայաստան» գազամուղի ծրագիրն է, երբ գումար չծախսելով՝ մենք գազամուղ ենք կառուցել եւ ներդրումներ ներգրավել «Գազպրոմ» ընկերությունից 600 մլն դոլարի չափով»,-նշեց երկրորդ նախագահը:
Քոչարյանը պարզաբանեց , որ 1998 թվականին ներդրումների ընդհանուր ծավալը կազմել է ավելի քան 120 մլն դոլար, իսկ 2008-ին՝ ավելի քան 4 մլրդ դոլար:
«1998 թվականին ծայրաստիճան աղքատության ցուցանիշները եղել են 21%-ի մակարդակում, իսկ 2008 թվականին այդ ցուցանիշը կրճատվել է 3,1%-ով: 2020 թվականին տնտեսական անկումը , օրինակ, կազմել է ավելի քան 7%: Ես այնպիսի տպավորություն ունեմ, որ կյանքս իզուր եմ ապրել: Իշխանությունն այսօր չի ապահովում մարդկանց նույնիսկ բազային պահանջներով: Նրանք անդառնալի սխալներ են թույլ տվել»,-հավելեց Քոչարյանը:
