Սահմանային իրադրության վերաբերյալ ես իմ տեսակետը քանիցս արտահայտել եմ. Մենք արձանագրում ենք, որ մենք մեր դաշնակիցների աջակցությամբ սահմանային իրադրությունը պետք է լուծենք խաղաղ ճանապարհով, որովհետեւ դրա հնարավորությունը իրապես կա: Այս մասին, այսօր՝ հունիսի 15-ին, Սյունիքի մարզի Սիսիան քաղաքում քարոզարշավի ժամանակ նշեց վարչապետի պաշտոնակատար, «Քաղաքացիական պայմանագիր» կուսակցության վարչապետի թեկնածու Նիկոլ Փաշինյանը:
«Ադրբեջանի զորքերն աներկբայորեն պետք է դուրս գան Հայաստանի սահմաններից անդին, եւ այս տեսակետը պաշտպանում է ողջ միջազգային հանրությունը: Մենք այսօր էլ մեր ռուս գործընկերների հետ ամենօրյա կապի մեջ ենք եւ մեր պատկերացումը հետեւյալն է. սահմանային կետերի երկայնքով պետք է տեղակայվեն ռուս խաղաղապահների ներկայացուցիչներ, որոնք նաեւ միջազգային դիտորդների հովանու ներքո պետք է տեղի ունենա Սոթքից Խոզնավար սահմանային կետերի ճշգրտում եւ սահմանների դելիմիտացիա եւ դեմարկացիա: Մինչ այդ մենք ասել ենք, որ զորքերը հայելային եղանակով պետք է վերադառնան իրենց մշտական տեղակայման վայրեր: Մենք հետեւողականորեն գնալու ենք այս ճանապարհով»,-ասաց նա:
Նիկոլ Փաշինյանը կասկածներ հայտնեց, որ փորձ է արվում ազդել ընտրությունների վրա. «Այո, ես մտածում եմ եւ կասկածներ ունեմ, որ այս միջադեպերով փորձ է արվում ազդել նաեւ ՀՀ-ում ընտրությունների արդյունքների վրա, բայց մենք մեր միասնությամբ ու միակամությամբ, պետք է հստակ քայլենք մեր երկիրը, մեր տարածքային ամբողջականությունը պաշտպանելու ճանապարհով, եւ մենք դա միասին անպայման կանենք»,-ընդգծեց Փաշինյանը»
Նա նաեւ իր խոսքի վերջում հայտարարեց, թե հունիսի 17–ին, ժամը 20։00–ին Հանրապետության հրապարկում տեղի է ունենալու ՔՊ–ի համապետական հանրահավաքը:
