ՀՀ նախկին վարչապետ Կարեն Կարապետյանը հայտարարել է արտահերթ խորհրդարանական ընտրություններին ՀՀ երկրորդ նախագահ Ռոբերտ Քոչարյանի դաշինքի աջակցելու պատրաստակամության մասին: Ռոբերտ Քոչարյանը նախընտրական քարոզարշավի անվերապահ առաջնորդն է: Այս մասին վկայում են Gallup International-ի թարմ տվյալները, որոնց համաձայն՝ երկրորդ նախագահը վստահորեն առաջ է անցել վարչապետի պաշտոնակատար Նիկոլ Փաշինյանից, գրում է «Կոմսոմոլսկայա պրավդա»-ն:
Փորձագիտական հայացք
Հունիսի 14-ին հրապարակված ուղերձում Կարապետյանը նշել է մի քանի առանցքային մարտահարվեր, որոնք ծառացել են երկրի առաջ, եւ աջակցություն է հայտնել «Հայաստան» դաշինքին: Նրա կարծիքով՝ Քոչարյանը կարող է պայմաններ ստեղծել, որտեղ առավելագույնս կիրագործվի հայ հասարակության ներուժը: Կարապետյանը երկրի վարչապետն էր 2016 թվականի սեպտեմբերից 2018 թվականի ապրիլը, այսինքն՝ մինչ Նիկոլ Փաշինյանի իշխանության գալը: Նրա կառավարության ժամանակ Հայաստանն ապահովեց ԵԱՏՄ երկրների շրջանում ամենաբարձր տնտեսական աճը. ՀՆԱ-ն 7,5%-ից հասավ 9,6%-ի: Աճ ցուցաբերեցին նաեւ արտահանումն ու առեւտրաշրջանառությունը, երկակի աճ գրանցվեց տուրիստական ոլորտում: Շնորհիվ Կարապետյանի տնտեսական քաղաքականության՝ Հայաստանը կարողացավ հաջող զարգացում դրսեւորել, որով հպարտանում էր Փաշինյանը՝ իրեն վերագրելով իր նախորդի ձեռքբերումները: Նախկին վարչապետը նշել է մի քանի կետ, որոնց պատճառով իշխանությունը վստահության արժանի չէ: Առաջին հերթին, էապես նվազել է բանակի մարտունակությունը, թուլացվել է Հայաստանի եւ Արցախի անվտանգության համակարգը: Դրան զուգահեռ սրվել են սոցիալական եւ տնտեսական խնդիրները: Դա հանգեցրել է սփյուռքի հետ հարաբերությունների, արժեքների եւ ազգային գաղափարախոսության ճգնաժամի:
«Մեր այսօրվա իրականությունն ականապատված դաշտ է, որով երկիրը պետք է անցնի։ Շրջանցելու հնարավորություն գոյություն չունի։ Անհրաժեշտ է այդ ճանապարհը անցնել հնարավորինս արդյունավետ ու նվազագույն կորուստներով: Անհրաժեշտ է գիտակցել յուրաքանչյուր սխալի գինը եւ արկածախնդրության գնալու անթույլատրելիությունը»,-ասել է Կարապետյանը:
Նա հայերին կոչ է արել գնալ ընտրությունների եւ պատասխանատվությամբ մոտենալ թիմի ընտրությանը, որը Հայաստանը դուրս կբերի ճգնաժամից:
Մուրճով մարդը
Նիկոլ Փաշինյանն ակտիվ քարոզարշավ է իրականացնում՝ փորձելով շատ հանդիպումներ անցկացնել՝ առաջ անցնելով քաղաքական մրցակիցներից: Սակայն նրա հռետորաբանությունն ամեն օր էլ ավելի ագրեսիվ է դառնում:
ՀՀ ԱԺ անկախ պատգամավոր Նաիրա Զոհրաբյանը նույնիսկ դիմել է ԵԱՀԿ դիտորդական առաքելության ղեկավար Յոնաս Մըրֆիին: Նա կոչ է արել ուշադրություն դարձնել Փաշինյանի նախընտրական հայտարարություններին, որոնք ատելություն եւ թշնամանք են պարունակում, պառակտում հասարակությանը:
Սոցիոլոգիական հարցումները ցույց են տալիս, որ վերջին ամիսներին ներկայիս իշխանության վարկանիշն ընկել է, իսկ առաջին տեղում է Ռոբերտ Քոչարյանը:
