Թուրքիան Անդրկովկասում առաջատար դերերից մեկի հայտ է ներկայացնում: Այս մասին հայտարարեց Արցախի արտգործնախարար Դավիթ Բաբայանը, NEWS.am-ի խնդրանքով մեկնաբանելով Էրդողանի եւ Ալիեւի այցը գրավյալ հայկական Շուշի քաղաք եւ հռչակագրի ստորագրումը, որը, ի թիվս այլ բաների, նախատեսում է թուրքական զորակազմի տեղակայում Աղդամում։
«Սա ադրբեջանա-թուրքական դաշինքի էքսպանսիոնիստական քաղաքականության հերթական դրսեւորումն է: Եւ դրանք շատ հեռուն գնացող ծրագրեր են»,- ընդգծեց Դավիթ Բաբայանը:
«Ի դեպ, այսօր Ադրբեջանում ազգային փրկության օր է: Նրանք Էրդողանի այցը դրան են նվիրել: 1993-ին հենց այդ օրն է իշխանության վերադարձել Հեյդար Ալիեւը: Սիմվոլիզմը ամենուր է դրսեւորվում:
Իմ նախորդ հարցազրույցներից մեկում ես ասել էի, որ նրանք Շուշիի համար պատրաստում են արմատականության, էքսպանսիոնիզմի եւ պանթուրքիզմի ֆորպոստի դերը: Հիմա դա փաստացի տեղի է ունենում: Մենք հարցեր ունենք միջազգային հանրությանը, այն կազմակերպություններին, որոնց անդամ է Թուրքիան, այդ թվում ՆԱՏՕ-ին՝ ի՞նչ է տեղի ունենում: Թուրքիայի նախագահը բացահայտ էքսպանսիոնիստական քաղաքականություն է վարում»,- ասաց Բաբայանը:
Նա հիշեցրեց, որ անցյալ դարի սկզբի իրադարձություններից հետո թուրք-ադրբեջանական միավորումների եւ ավազակային կազմավորումների կողմից կազմակերպված հայերի կոտորածին հաջորդած հարյուր տարիներին զավթիչների արտաքսումից հետո թուրք առաջնորդը ոտք չէր դրել Շուշի: «Հիմա սա էքսպանսիայի հայտ է, խաղաղության մասին խոսքերի ներքո՝ հայերի նկատմամբ սպառնալիքներ եւ ատելություն, եւ սա պետական ահաբեկչության դրսեւորում է: Եթե միջազգային հանրությունը պատշաճ չարձագանքի, տարածաշրջանը լուրջ խնդիրներ կունենա: Խնդիրներ կլինեն նաեւ տարածաշրջանից դուրս, քանի որ Անդրկովկասը ռազմավարական կարեւոր տարածաշրջան է, եւ այն, ինչ տեղի է ունենում այստեղ, չի կարող չանդրադառնալ հարեւան պետությունների եւ աշխարհաքաղաքական տարածքների վրա: Այն, ինչ հիմա ունենք, պետք է առաջացնի միջազգային հանրության մտահոգությունը, ինչպես նաեւ ազդանշան դառնա մի շարք հայ պետական գործիչների համար, որպեսզի նրանք գոնե հիմա ուշքի գան»,- հորդորեց արտգործնախարարը:
Մեկնաբանելով Աղդամում թուրքական զորամիավորման տեղակայման մասին լուրը` Բաբայանը հիշեցրեց, որ ավելի վաղ ինքը կանխատեսել էր Ադրբեջանի եւ Թուրքիայի կողմից «Ղարաբաղ» կոչվող արհեստական կազմավորման ստեղծումը` որպես հայկական Ղարաբաղի հակակշիռ, որը ադրբեջանա-թուրքական դաշինքը չկարողացավ նվաճել երկրորդ պատերազմում: «Այս գործընթացն գնում է: Այս հայտարարությունը ցույց է տալիս, որ Թուրքիան, հնարավոր է, ինչ-որ նոր «Ղարաբաղ» կազմավորման ստեղծման նախագիծ է սկսել: Ավելին, Շուշին կարող է դառնալ այս կազմավորման կենտրոնը: Աղդամին ակնհայտորեն ֆորպոստի դեր են վերապահել՝ Ղարաբաղի վրա ճնշելու համար: Թուրքիան ցույց է տալիս, որ մտադիր չէ լքել տարածաշրջանը, այլ, ընդհակառակը, ամրապնդվում է»,- եզրափակեց Դավիթ Բաբայանը:
