Ճապոնիան նախատեսում է սկսել պատվաստման անձնագրերի հանձնումը մոտավորապես հուլիսի կեսից մինչեւ վերջ, տեղեկացնում է «Ինտերֆաքսը»՝ հղում կատարելով ճապոնական լրատվամիջոցներին։
«Որպեսզի հանձնումը շուտ սկսենք, մենք սկզբում կտանք պատվաստման թղթե վկայականներ, բայց նաեւ կդիտարկենք դրանց հաձնման հնարավորությունը թվային ձեւաչափով»,- ասել է կառավարության գլխավոր քարտուղար Կացունոբու Կատոն հինգշաբթի օրվա մամուլի ասուլիսում։
«Պատվաստման անձնագրերի հանձնումը կսկսվի հուլիսի կեսից մինչեւ վերջ»,- գրում են տեղական լրատվամիջոցները։
Ավելի վաղ կառավարական աղբյուրները տեղեկացրել էին, որ Ճապոնիայի իշխանությունները կխնդրեն այլ երկրներին կարանտինից ազատել այն ճանապարհորդներին, որոնք պատվաստման մասին փաստաթղթեր ունեն, կամ կրճատել կարանտինի փուլը։
Վկայականում նշված կլինեն տիրոջ անունը, ծննդյան տարեթիվը, անձնագրի համարը, պատվաստման ամսաթիվը եւ պատվաստանյութի արտադրողը ճապոներեն եւ անգլերեն։ Պատվաստման անձնագրերը կտրվեն անվճար։
Պատվաստումը Ճապոնիայում սկսել են փետրվարին բուժաշխատողներից, ապրիլին սկսել են պատվաստել 65 եւ բարձր տարիքի անձանց։ Որոշ քաղաքներում վերջերս սկսել են պատվաստել մինչեւ 65 տարեկան անձանց, որոշ ընկերություններ պատվաստում են նաեւ իրենց աշխատակիցներին։
Սակայն, չնայած պատվաստման տեմպերի ավելացմանը, Ճապոնիայում պատվաստում ստացած բնակիչների բաժինը նախկինի պես մնում է շատ ավելի ցածր, քան զարգացած այլ երկրներում։
