Հայաստանի կառավարությունն իր այսօրվա՝ հունիսի 17-ի նիստում փոփոխություններ կատարեց իր որոշումներից մեկում եւ ներեց «ԱՎԵԼԻԱՑ» սահմանափակ պատասխանատվությամբ ընկերության պարտքը:
Որոշման հիմնավորման մեջ նշվում է, որ Կառավարության 2019-ի օգոստոսի 1-ի որոշման համաձայն թույլատրվել է Պետգույքի կառավարման կոմիտեին Աշխատանքի և սոցիալական հարցերի նախարարությանն ամրացված, պետական սեփականություն հանդիսացող՝ Երևան քաղաքի Շրջանցիկ թունել փողոց 52/1 հասցեում գտնվող 871.9 քառ. մետր մակերեսով անշարժ գույքը, ինչպես նաև դրա զբաղեցրած, օգտագործման ու սպասարկման համար հատկացված 0.2157 հեկտար մակերեսով հողամասը ուղղակի վաճառքի ձևով օտարել «Ավելիաց» ՍՊԸ-ին:
Նույն որոշման համաձայն սահմանվել է, որ ընկերությունը պարտավորվում է մինչև 2020 թվականի ավարտն իր կողմից ներկայացված ներդրումային ծրագրին համապատասխան իրականացնել 259 760 000 դրամի ներդրում (հնարավոր շեղման հավանականությունը մինչև 15%), ինչպես նաև մինչև 2021 թվականի ավարտը ստեղծել 45 սեզոնային նոր աշխատատեղ (տարեկան առնվազն 5 ամիս)՝միջինը 125 000 դրամ ամսական աշխատավարձով։
Ընկերության կողմից ստանձնած պարտավորությունները սահմանված ժամկետում չկատարելու արդյունքում, ընկերության նկատմամբ հաշվարկել է 48 852 000 ՀՀ դրամի չափով տուգանք:
Ընկերությունը դիմել է Կոմիտեին եւ նշել, որ պարտավորությունները չկատարելը պայմանավորված է եղել արտակարգ դրություն հայտարարելու հանգամանքով:
Ընկերությունը գրություններով տեղեկացրել է նաև, որ նոր արտադրական հզորությունների համար նախատեսված 900 քառ. մետր մակերեսով մասնաշենքի (մոդուլի) ձեռքբերման նպատակով՝ արտակարգ դրության պայմաններում շարունակել է բանակցությունները պարսկական ընկերություններից մեկի հետ, ով նույնպես համավարակով պայմանավորված իր 15.04.2020 թվականի գրությամբ տեղեկացրել է մոդուլի ՀՀ ներմուծելու անհնարինության մասին (գրեթե 4 ամիս փակ է եղել ՀՀ-Իրան սահմանը):
Կոմիտեի կողմից սույն նախագծով առաջարկվում է ներել Շրջանցիկ թունել, փողոց թիվ 52/1 հասցեում գտնվող գույքի օտարման արդյունքում Ընկերության կողմից ստանձնած պարտավորությունների չկատարման արդյունքում Կոմիտեի կողմից հաշվարկված տուգանքը և երկարաձգել նշված ներդրումների կատարման վերջնաժամկետները։
