Իսրայելում նյարդային կերպով են արձագանքել Իրանում նախագահական ընտրություններում Իբրահիմ Ռաիսիի հաղթանակի առնչությամբ:
Իսրայելի արտաքին գործերի նախարարության ներկայացուցիչ Լիոր Հայաթը հայտարարել է, որ միջազգային հանրությունը պետք է լրջորեն մտահոգվի Իրանի նախագահի պաշտոնում Իբրահիմ Ռաիսիի ընտրվելու կապակցությամբ:
Թվիթերյան իր էջում նա Ռաիսիին անվանել է «այսօրվա դրությամբ Իրանի ամենածայրահեղական նախագահ»: Նա նաեւ նախազգուշացրել է, որ նոր առաջնորդը «կմեծացնի Իրանի միջուկային ակտիվությունը»:
Իբրահիմ Ռաիսին նախօրեին հայտարարվել է Իրանում նախագահական ընտրությունների հաղթող: Ռաիսին, որի երդմնակալությունը կկայանա օգոստոսին, եղել է գլխավոր դատավոր: Նրա նկատմամբ ԱՄՆ-ում պատժամիջոցներ են սահմանվել: Հաղթանակից հետո տարածած հայտարարության մեջ նա խոստացել է ամրապնդել հասարակության վստահությունը կառավարության նկատմամբ եւ դառնալ ամբողջ երկրի առաջնորդը:
