Հնդկաստանում սկսվել է COVID-19-ի դեմ անվճար պատվաստման համազգային գործընթացը բոլոր մեծահասակների համար, տեղեկացնում է Reuters-ը։

Քանի որ նահանգների մեծ մասը փակել է պատվաստման կենտրոնները երիտասարդների համար՝ հղում կատարելով պատվաստանյութի անբավարարությանը, մեծամասնությունը սկսել է դիմել մասնավոր հիվանդանոցներ, որոնք մեկ չափաբաժնի համար գանձում էին 9-24 դոլար, եւ քաղաքային ու գյուղական շրջանների միջեւ խզումը մեծացել է։

Երկրում օգտագործում են երկրի ներսում արտադրված AstraZeneca եւ Bharat Biotech հնդկական ընկերության արտադրած Covaxin։

Փորձագետները նախազգուշացրել են հնարավոր երրորդ ալիքի մասին, քանի որ 950 մլն բնակիչների միայն 5 տոկոսն է, որին պետք է պատվաստեին, լրիվ պատվաստվել երկու չափաբաժնով։

Վերջին 24 ժամում Հնդկաստանում գրանցվել է վարակման 53 256 դեպք, ինչը ամենացածր ցուցանիշն է մարտի 24-ից հետո։ Հիվանդացության գագաթնակետը մայիսին էր՝ 400 000 մարդ օրական, իսկ մահերի թիվը կտրուկ աճեց մինչեւ 170 000 մարդու ապրիլ-մայիսին։

Քանի որ քաղաքների մեծ մասը սկսել է չեղարկել սահմանափակումները, փորձագետները նախազգուշացրել են, որ աշխատանքի արագ վերականգնումը կարող է դժվարացնել պատվաստման ծրագիրը, որը պետք է առնվազն չորս անգամ ավելի արագ ընթանա։

Ամենօրյա պատվաստումը Հնդկաստանում հասել է գագաթնակետին՝ 4,5 մլն պատվաստում ապրիլի 5-ին, բայց այդ ժամանակվանից կտրուկ անկում է ունեցել։ Վերջին 30 օրում Հնդկաստանում միջինը օրական 2,7 մլն չափաբաժին է ներարկվել։