Ֆիլիպինների նախագահ Ռոդրիգո Դուտերտեն կորոնավիրուսի վարակի դեմ պատվաստվելուց հրաժարվող մարդկանց խոստացել է, որ նրանց կարող են կալանավորել։ Այս մասին նա ասել է ամենշաբաթյա ճեպազրույցում, տեղեկացնում է Gazeta-ն՝ հղում կատարելով CNN-ին։
«Ինձ սխալ չհասկանաք, այս երկրում ճգնաժամային իրավիճակ է, արտակարգ դրություն։ Եթե դու չես ուզում պատվաստվել, ես քեզ կբռնեմ ու կպատվաստեմ»,- ասել է Ֆիլիպինների նախագահը։
Դուտերտեի խոսքով՝ COVID-19-ի դեմ պատվաստվել չցանկացող քաղաքացիներն իրենց գործողություններով ավելի են վատթարացնում իրավիճակը։
«Եթե ձեզ պատվաստում չանեն, հեռացեք Ֆիլիպիններից»,- ընդգծել է նախագահը։
Պատվաստման հակառակորդները, ինչպես ավելացրել է Դուտերտեն, կարող են թողնել երկիրն ու հեռանալ «Հնդկաստան կամ Ամերիկա»։ Ապագայում կարող են հայտնվել այն մարդկանց ցուցակները, ովքեր շարունակում են հրաժարվել պատվաստվելուց։
Դուտերտեն հիմար է համարում այն մարդկանց, «ովքեր չեն ցանկանում պատվաստվել»։
