Զինվորականների քվեարկությունն էապես փոխեց պատկերը Սյունիքում: Այս մասին հունիսի 22-ին լրագրողների հետ հանդիպմանն ասաց ՀՀ երկրորդ նախագահ, «Հայաստան» դաշինքի առաջնորդ Ռոբերտ Քոչարյանը:
«Սոցցանցերում բազմաթիվ տեսանյութեր կային, թե ինչպես են զինվորներին տեղամասեր բերում, սպաները նրանց կողքին էին եւ հետեւում էին: Կան ապացույցներ, որ զինվորները ցույց են տվել, թե ինչպես են քվեարկում: Հանձնաժողովի անդամները չէին կարողանում սպաներին տեղամասերի տարածքներից հեռացնել: Զինծառայողների քվեարկությունն էապես փոխեց իրավիճակը Սյունիքում»,- ասաց Քոչարյանը: Ընդ որում, նա կրկին հայտարարեց, որ ամենամեծ խնդիրը ժամանակի սղությունն էր եւ գյուղի հետ աշխատելու անհնարինությունը: «Գյուղը գտնվում է հանրային հեռուստատեսության ազդեցության տակ, իսկ հանրային հեռուստատեսությունը չի կարող համարվել հանրային, որպես այդպիսին, այն ծառայում է կառավարությանը»,- հավելեց նա:
Դաշինքի ղեկավարը հարց հնչեցրեց, թե ինչու որոշ ուժեր, որոնք պետք է բոլոր հարցումներով շատ ավելի շատ ձայն ստանային, այդքան քիչ ստացան. «ՀԱԿ», «Լուսավոր Հայաստան», «Բարգավաճ Հայաստան»: Ինչո՞ւ նրանք բոլորն այդքան քիչ հավաքեցին, ինչը հնարավորություն տվեց, որ իշխող ուժն այդքան շատ հավաքել»,- ասաց Քոչարյանը:
Հարցին՝ արդյո՞ք իշխանության ստանալու հարցը շարունակում է մնալ օրակարգում, Քոչարյանը պատասխանեց՝ անկասկած: «Այդ դեպքում ինչո՞ւ գնալ խորհրդարան: Մեր նպատակը լիակատար հաղթանակն է: Ինչպես ասացի, մենք գրավեցինք առաջին խրամատները: Կամրապնդվենք այնտեղ եւ կապահովենք լիարժեք հաղթանակ: Իսկ դուք ի՞նչ եք կարծում, մենք խորհրդարան ենք գնում ինչ-որ որոշ մանդատների համա՞ր: Ոչ, մենք պատրաստվում ենք վերցնել ամբողջ իշխանությունը: Հարցը դուրս կգա օրակարգից, եթե ներկայիս կառավարությունը հեռանա եւ ազգային ուժ կամ իշխանություն հայտնվի: Այդ ժամանակ ես ինձ ազատ կհամարեմ: Իսկ այս իշխանություններն ապացուցեցին, որ սպառնալիք են Հայաստանի համար, եւ դրանց պետք է հեռացնել»,- շեշտեց Քոչարյանը:
Պատասխանելով հարցին, որ դիտորդներն էական խախտումներ չեն գրանցել, եւ այդուհանդերձ արդյո՞ք ինքը վստահում է նրանց, եւ եթե՝ այո, ապա ինչո՞ւ դիմել ՍԴ, Քոչարյանը հիշեցրեց, որ նախորդ բոլոր ընտրություններում հնչել էին մոտավորապես նույն հայտարարությունները: «Բայց ոչ մի երկրում ոչ ոք չի խոսում, քանի որ դիտորդները հայտարարություն են արել, Սահմանադրական դատարան դիմելու անհրաժեշտություն չկա: Սահմանադրական դատարան դիմը մեր իրավունքն է, մենք էլ դիմում ենք՝ հասկանալու եւ արձանագրելու խախտումների ծավալը»,- ասաց Քոչարյանը՝ հավելելով, որ խոսքն ընտրությունների արդյունքներին պետության համակարգային միջամտության մասին է: