Գերիներին վերադարձնելու հարցը մշտապես գտնվում է Ռուսաստանի գերակա ուշադրության կիզակետում։ Այս մասին հունիսի 22-ին լրագրողների հետ զրույցում ասել է Հայաստանում Ռուսաստանի Արտակարգ եւ լիազոր դեսպան Սերգեյ Կոպիրկինը։

Նա հիշեցրել է, որ Ռուսաստանը ողջունել է 15 գերիների վերադարձը՝ նշելով, որ դա, անշուշտ, ճիշտ ուղղությամբ արված քայլ է։

«Հայտնի է, որ Ռուսաստանը սկզբից եւեթ արել եւ անում է հնարավոր ամեն ինչ, որպեսզի սա իրականացվի, եւ շարժումն այդ ուղղությամբ առաջ է գնացել։ Այստեղ շատ մեծ դեր է խաղացել անձամբ գեներալ Ռուստամ Մուրադովը՝ մեր խաղաղապահ զորակազմի հրամանատարը։ Դրանով զբաղվում են երկրի նախագահը, պաշտպանության նախարարը եւ արտաքին գործերի նախարարը։ Միշտ չէ, որ դա հեշտ է, եւ պահանջում է լուրջ ջանքեր։ Վերջին փոխանակումը (գերիների փոխանակումը ականապատ դաշտերի քարտեզներով – խմբ.) նույնպես չեմ կարծում, որ հնարավոր կլիներ, եթե չլիներ ռուսական կողմի, ռուս խաղաղապահների նախապատրաստական, շատ էական աշխատանքը։ Այդ աշխատանքը մշտապես գտնվում է ուշադրության կիզակետում, ջանքերի կիզակետում, եւ աշխատանքը կշարունակվի»,- ավելացրել է դեսպանը։