Թուրքիայի նախագահ Ռեջեփ Թայիփ Էրդողանին զիջումներ անել չի կարելի՝ «եթե նա էապես չփոխի վարքագիծը»։ Այս մասին Kathimerini-ի հարցազրույցում ասել է ԱՄՆ Սենատի միջազգային հարաբերությունների կոմիտեի նախագահ Բոբ Մենենդեսը։

Մենենդեսի խոսքով՝ Թուրքիան շարունակում է Արեւելյան Միջերկրածովում ցուցադրել սադրիչ վարքագիծ «ապակայունացնող գործողություններով», ինչպես նաեւ ռուսական С-400 հակահրթիռային համակարգերի գնման հարցում, «Ադրբեջանին իր աջակցությամբ եւ թուրք ժողովրդի հանդեպ ոչ դեմոկրատական վերաբերմունքով»։

«Երկկողմ հարաբերությունները ԱՄՆ-ի եւ Հունաստանի միջեւ երբեք այսքան ամուր չեն եղել, եւ համագործակցությունը պաշտպանության ոլորտում առանցքային տարր է համարվում»,- նշել է նա։

Մենենդեսն ակնկալում է, որ ԱՄՆ նախագահ Ջո Բայդենը այսուհետ եւս ամուր դիրքորոշման կմնա Էրդողանի հանդեպ, եւ կարծում է, որ 3+1 գործընկերությունը Կիպրոսի, Հունաստանի, Իսրայելի եւ ԱՄՆ-ի միջեւ կարող է զգալի օգուտներ բերել տարածաշրջանին։

Աղբյուրի համաձայն՝ սենատորը «քանիցս աջակցություն է հայտնել Հունաստանին Էգեյան ծովում թուրքական մարտահրավերների, ինչպես նաեւ վճռական դեր է խաղացել Վաշինգտոնի կողմից Հայոց ցեղասպանության ճանաչման հարցում»։