Տոսկանայի ընտանեկան փաստաբանների ասոցիացիան հայտարարել է, որ Ֆլորենցիայից մի դեռահաս դիմել է փաստաբաններին, քանի որ ծնողները արգելում են նրան պատվաստել COVID-19-ի դեմ, հաղորդել է ՌԻԱ Նովոստի-ն:
Դպրոցականը հայտնել է, որ ծնողները պատվաստման գրավոր թույլտվություն չեն տալիս իրեն:
«17 տարեկան լինելով՝ նա չի կարող ուղղակիորեն փաստաբան ընտրել եւ չի կարող պատվաստվել առանց ծնողների կողմից ներկայացված փաստաթղթի», - ասել է ասոցիացիայի ներկայացուցիչ Ջաննի Բալդինին:
Տեղական ԶԼՄ-ների հաղորդմամբ՝ պատանու խոսքով՝ ծնողները պատվաստանյութերը վտանգավոր են համարում: Խնդրի մասին իմացել են սոցիալական ծառայություններն ու դպրոցը, որը կրթության նախարարության միջոցով դիմել է փաստաբաններին:
«Մինչ այժմ դիմումը դատարան չի հասել: Ես կփորձեմ խոսել ծնողների հետ, որպեսզի նրանք փոխեն իրենց կարծիքը: Հակառակ դեպքում գործը կփոխանցվի անչափահասների տրիբունալ, իսկ դատախազությունից հատուկ կուրատոր կնշանակվի», - նշել է փաստաբանը:
Բացի այդ, Բալդինին ընդգծել է, որ նման դեպքեր Իտալիայում սկսել են բավականին հաճախակի պատահել: Նմանատիպ դեպք է տեղի ունենում Արեցցո քաղաքի մի ընտանիքի հետ, որտեղ 16-ամյա երիտասարդը ցանկանում է պատվաստվել:
