Գաբոնը դարձել է աֆրիկյան առաջին երկիրը, որին վճարել են ածխածնի արտանետումների կրճատման համար՝ իր արեւադարձային անտառները պաշտպանելու միջոցով:
ՄԱԿ-ի կողմից աջակցվող Կենտրոնական Աֆրիկայի անտառային նախաձեռնությունը (Cafi) տրամադրել է ավելի քան 17 մլն դոլար՝ 2019 թվականին կնքված 150 միլլիոն դոլար արժողությամբ գործարքի առաջին տրանշը:
Գաբոնի տարածքի գրեթե 90 տոկոսը ծածկված է անտառներով, որոնք կլանում են ավելի շատ ածխածին, քան արտանետում է երկիրը: Արեւադարձային անտառները կենսական նշանակություն ունեն կլիմայի համար վնասակար արտանետումների կլանման տեսանկյունից:
Գաբոնը կարողացավ ցույց տալ, որ ի վիճակի է կրճատել անտառահատումները եւ 2016 ու 2017 թվականներին, նախորդ տասնամյակի համեմատ, նվազեցնել ածխածնի արտանետումները:
Նորվեգիան Cafi-ի միջոցով Գաբոնին 17 միլիոն դոլար է վճարել ածխածնի այն քանակի համար, որը կարող էր արտանետվել: Մնացած 150 միլիոն դոլարը փոխանցվելու է առաջիկա տարիներին:
Սկզբնական վճարը Գաբոնի տարեկան ՀՆԱ-ի ընդամենը 0,1 տոկոսն է, սակայն անտառտնտեսության նախարար Լի Ուայթը BBC-ին ասել է, որ դա կարեւոր առաջին քայլն է եղել:
Նախարարի խոսքով՝ Նորվեգիան հաստատել է անտառահատումների եւ ածխածնի արտանետումների մոնիտորինգի՝ Գաբոնի համակարգերը, որոնք կարող են օգտագործվել օգնելու համար ածխածնի բարձր արտանետումներ ունեցող երկրներին վճարել Գաբոնին ապագայում նրա ռեսուրսները կառավարելու համար: