Եվրասիական տնտեսական միության (ԵԱՏՄ) պետությունները փոխհաշվարկներում ռուբլու մասնաբաժինը հասցրել են ավելի քան 70 տոկոսի: Այս մասին հայտարարել է Ռուսաստանի Դաշնության փոխվարչապետ Ալեքսեյ Օվերչուկը՝ ելույթ ունենալով Դաշնության խորհրդում, փոխանցում է ՏԱՍՍ-ը:
«ԵԱՏՄ երկրների միջեւ ապրանքաշրջանառության մեջ ռուսական ռուբլու դերի բարձրացման միտում է նկատվում: Վերջին հինգ տարիների ընթացքում դրա մասնաբաժինը վճարումների կառուցվածքում աճել է՝ կազմելով 72.5 տոկոս»,- ասաց Օվերչուկը՝ հավելելով, որ խոսքը 2019 թվականի տվյալների մասին է:
ԵԱՏՄ երկրները պետք է ածխաջրածնային էներգիայի աղբյուրների օգտագործումը սահմանափակող ԵՄ միջոցառումների հետ կապված նոր տնտեսական քաղաքականություն մշակեն, ասել է Օվերչուկը:
«Զարգացած երկրները որոշել են հրաժարվել ոչ միայն ածխաջրածնային էներգիայի աղբյուրներից եւ ներքին այրման շարժիչներից, այլեւ՝ ածխածնային հետք առաջացնող ապրանքներից: Նոր սահմանափակող միջոցները կանդրադառնան ռուսական արտահանման հիմնական հոդվածների վրա՝ հանգեցնելով տնտեսության լայնամասշտաբ վերակազմավորման անհրաժեշտությանը: ԵԱՏՄ-ն ստիպված կլինի ընդհանուր տնտեսական քաղաքականություն մշակել եւ որդեգրել այս ոլորտում, օգտագործել կոլեկտիվ բանակցային ռեսուրսն այնպիսի խոշոր տնտեսությունների հետ փոխգործակցելու համար, ինչպիսիք են ԵՄ-ն, ԱՄՆ-ն եւ Չինաստանը»,- ասել է փոխվարչապետը: