Գերեվարված հայ զինծառայողների ծնողներն ու հարազատները հունիսի 24-ին բողոքի ակցիա են անցկացրել Հայաստանի կառավարության շենքի դիմաց:
Ցուցարարներից մեկի խոսքով՝ իշխանություններն անընդհատ ասում են, որ պետք է մի փոքր էլ սպասել, որ գերիներին հաստատ տուն կվերադարձնեն, եւ որ այս պահին բանակցություններ են ընթանում: «Բայց ես այլեւս չեմ կարող սպասել, համբերություն չունեմ: Վերջ, այլեւս չեմ դիմանում, յոթ ամիս դիմացա»,- ասաց ծնողներից մեկը:
Նրանք նաև կասկած հայտնեցին, որ գերության մեջ գտնվող իրենց երեխաները կկարողանան դիմանալ եւս երկու ամիս, ինչպես նախկինում հայտարարել էր հանրապետության վարչապետի պաշտոնակատար Նիկոլ Փաշինյանը: «Իրավիճակն էլ ավելի է վատացել: Այն ժամանակ նրանց դեմ գոնե քրեական գործեր չէին հարուցում, դատական վճիռներ չէին կայացնում, բայց հիմա նրանք մեղադրվում են ահաբեկչության մեջ եւ կարող են բանտ նստել: Մի՞թե մենք ահաբեկիչներ ենք դաստիարակել»,- ասաց գերիներից մեկի հայրը:
Կանանցից մեկը, իր հերթին շեշտեց, որ իրենց երեխաները գնացել են հայրենիքը պաշտպանելու, իսկ Հայաստանի իշխանությունները ոչ մի կերպ չեն պաշտպանում իրենց քաղաքացիների իրավունքները: «Այդ տղաների կյանքը ոչ ոքի չի հետաքրքրում, նրանց ապագան չի հետաքրքրում: Ասում են, որ կա ապագա («Քաղաքացիական պայմանագիր» կուսակցության կարգախոսը Հայաստանում վերջերս կայացած արտահերթ խորհրդարանական ընտրություններում - խմբ.): Այդ ի՞նչ ապագա է. Բաքվի բա՞նտը: Դա՞ է որդուս ապագան»,- ասաց ադրբեջանցիների կողմից գերեվարված զինվորի մայրը:
