«Ես համաձայն եմ, որ արտագաղթ կա, որովհետեւ մարդիկ տարբեր են: Այս մասին, այսօր՝ հունիսի 24-ին, կառավարության նիստից հետո լրագրողների հետ ճեպազրույցում նշեց Էկոնոմիկայի նախարարի պաշտոնակատար Վահան Քերոբյանը:
Դիտարկիմանը, որ առաջին նախագահ Լեւոն Տեր-Պետրոսյանը հայտարարել էր, որ այս տարվա 4 ամսում 70 հազար մարդ է հեռացել երկրից, նախարարն արձագանքեց. «Այդտեղից պետք է հանենք սեզոնային մեկնողներին, որոնք վերադառնալու են սեզոնի վերջում: Արտագաղթը պետք է տարեկան կտրվածքով հաշվել, որ ճիշտ պատկեր ունենանք: Ես չեմ ժխտում, որ կա այդ միտումը: Իհարկե, մի մասը հիասթափված է 44-օրյա պատերազմի արդյունքներից: Միգուցե դժգոհներ կան նաեւ կառավարության աշխատանքից, չեմ ժխտում: Մենք պետք է այնպիսի միջավայր ստեղծենք, որ այդ հիասթափությունն առիթ չդառնա գնալու, այլ վերածվի այնպիսի էներգիայի որ վերադառնան»:
Ինչ վերաբերում է պնդմանը, թե ՔՊ-ի վերարտադրությունից հետո շատերն են ուզում լքել հայրենիքը, Էկոնոմիկայի նխարարն արձագանքեց. «Մեր ամենամեծ ձեռքերումը ազատ, արդար ընտրությունների անցկացումն էր, ոչ թե այն, թե ով հաղթեց, ով պարտվեց: Մենք ցեմենտեցինք, բետոնեցինք մեր ժողովրդավարական ճանապարհը: Ես շատ եմ շփվում միջազգային կառույցների հետ, Հայաստանի ամենամրցակցային առավելությունը տարածաշրջանում ազատ տնտեսությունն է:
Այո, կար միտում մինչեւ ընտրությունները, որ արտագաղթում են, մեր խնդիրն է շուտ փարատենք այդ անհանգստությունները, անվտանգային ու ներդրումային միջավայրը վերականգնենք, որ մարդիկ վերադառնան ու արարեն հայրենիքում»:
