Ռուսաստանը պատրաստ է հնարավորինս սեղմ ժամկետներում քննարկել Բելառուսին «Ս-400» հակաօդային պաշտպանության համակարգերի եւ «Պանցիր-Ս1» զենիթահրթիռային եւ հրանոթային համակարգերի մատակարարման հարցը Մինսկի համապատասխան հայտի դեպքում: Այս մասին լրագրողներին հայտնել է Ռուսաստանի Դաշնության Դաշնային ծառայության ռազմատեխնիկական համագործակցության գծով տնօրեն Անդրեյ Բոյցովը, փոխանցում է «ՌԻԱ Նովոստի»-ն:
«Մենք սերտ կապի մեջ ենք մեր բելառուս գործընկերների հետ ռազմատեխնիկական համագործակցության ոլորտի բոլոր հարցերի շուրջ, եւ «Ս-400» հակաօդային պաշտպանության համակարգերի եւ «Պանցիր-Ս1» համակարգերի մատակարարման հարցով համապատասխան հայտ ստանալու դեպքում հարցը հնարավորինս շուտ կմշակվի»,- ասել է նա MILEX-2021 զենքի ցուցահանդեսի ժամանակ:
Ավելի վաղ Բելառուսի Զինված ուժերի ռազմաօդային ուժերի եւ հակաօդային պաշտպանության ուժերի հրամանատար Իգոր Գոլուբը հայտնել էր, որ ներկայումս նախապայմանագրային աշխատանքներ են տարվում «Ս-300»-ներով զինված զենիթահրթիռային ուժերը նոր «Ս-400»-ներով եւ «Պանցիր-Ս»-երով վերազինման ուղղությամբ:
Բոյցովը նշել էր, որ Մոսկվայի եւ Մինսկի համագործակցությունը դրական դինամիկա եւ հետագա զարգացման իրական հեռանկարներ ունի:
