Ինձ համար անհասկանալի է, թե ինչու է թիրախում Չարչյանը. Ես լինեի, ինչ-որ տեղ կարող էինք հասկանալ, որ իրականում վնաս կտայի համակարգին, բայց Չարչյանը մտավորական է, վաստակաշատ բժիշկ, ինձ համար անհասկանալի է, թե ինչու են այս քայլին գնում: Այս մասին, այսօր՝ հունիսի 24-ին, դատախազության մոտ բողոքի ակցիայի ժամանակ լրագրողների հետ զրույցում նշեց «Հայաստան» դաշինքի անդամ Վահե Հակոբյանը՝ անդրադառնալով «Հայաստան» դաշինքում ընդգրկված բժիշկ Արմեն Չարչյանին կալանավորելու որոշմանը:
«Բայց այնքան էլ անհասկանալի չէ, այսօր պետական ապարատն ուզում է իրականացնել քաղաքական տեռոր, այսինքն մարդկանց աչքը վախացնի, այդ թվում այն համակիրների, որոնք մեզ ձայն են տվել»,- ասաց նա:
Հարցին, թե այդ դեպքում ինչու են համագործակցության առաջարկ անում, Վահե Հակոբյանը պատասխանեց. «Դե ինքն իրեն վարչապետէ նշանակել, ինչ-որ առաջարկ պետք է անի: Տեսաք էլի, ովքեր գնացին ձեռքը սեղմեցին: Այդ թվում այն մարդիկ էին, որ գոռում էին դավաճան, ազգի թշնամի: Այսինքն ստացվեց, որ իրենց համար սա աթոռի պատերա՞զմ էր: Այո»:
Նա ընդգծեց, որ եթե կարիքը լինի, Ռոբերտ Քոչարյանը եւս կմիանա ակցիաներին. «Մենք այդպես ենք որոշել, որ դեռեւս իր կարիքը չկա»:
Հիշեցնենք, որ Չարչյանին մեղադրանք է առաջադրվել ՀՀ քրեական օրենսգրքի 154.2-րդ հոդվածի հատկանիշներով՝ ընտրողներին կաշառք տալը, ստանալը, ընտրությունների ժամանակ բարեգործության արգելքի խախտումը կամ ընտրողի ազատ կամքի իրականացմանը խոչընդոտելը։
Արմեն Չարչյանն իրեն առաջադրված մեղադրանքը չի ընդունում:
Նշենք, որ ըստ ՀՔԾ քննիչի, Չարչյանը եթե մնա ազատության մեջ, ապա կթաքնվի վարույթն իրականացնող մարմինից ու կխոչընդոտի գործի քննությանը։
Հավելենք, որ Չարչյանին ձերբակալելը դատարանը ճանաչել էր ոչ իրավաչափ։ Նա ազատ արձակվելուց հետո ասուլիս էր տվել, որի ժամանակ անդրադարձել էր հարուցված քրեական գործին ու պնդել, որ այն «կարված գործ է»։
