Կանադան իրավասու չէ զեկույցներ ներկայացնել կամ կարծիք հայտնել 2020 թվականի հունվարին Թեհրանի մոտակայքում ուկրաինական ինքնաթիռի վթարի մասին: Այս մասին ուրբաթ հայտարարել է Իրանի փոխարտգործնախարար Մոհսեն Բահարվանդը, փոխանցում է ՏԱՍՍ-ը:
«Եթե Կանադայի նման անօրինական գործողությունները սովորական դառնան, ապա դա հարված կհասցնի բոլոր երկրներին, քաղաքացիական ավիացիային,- Իրանի արտաքին գործերի փոխնախարարի խոսքերը մեջբերում է IRNA գործակալությունը:- Բացի այդ, կանադական զեկույցի այն մասը, որը քննադատում է աղետի տեխնիկական կողմի վերաբերյալ իրանական զեկույցը, անհիմն ու անընդունելի է»:
«Պատկերացրեք, որ յուրաքանչյուր միջադեպի դեպքում երկրները անտեսեն հետաքննության կանոններն ու արձանագրությունները եւ փորձեն քաղաքական ճնշում գործադրել այն երկրի վրա, որտեղ տեղի է ունեցել միջադեպը,- ասել է Բահարվանդը:- Լրատվամիջոցներում եւ քաղաքական ոլորտում շահարկումների փոխարեն անհրաժեշտ էր իրանական կողմին նոր տեղեկատվություն տրամադրել դրա առկայության դեպքում»:
Կանադայի կառավարությունը նախօրեին զեկույց էր հրապարակվել Իրանում ինքնաթիռի կործանման մասին, որտեղ միջադեպի ողջ պատասխանատվությունը կրում են Իրանի իշխանությունները, եւ նրանք մեղադրվում են «անգործունակության» եւ «մարդկանց կյանքի նկատմամբ լիակատար անտարբերության» մեջ:
Ավելի վաղ՝ հունիսի սկզբին, Իրանի Գերագույն դատարանի ներկայացուցիչ Գոլյամ Հոսեյն Իսմայիլին հայտարարել էր, որ Իրանը նախատեսում է ամբողջությամբ փոխհատուցում վճարել ուկրաինական ինքնաթիռի կործանման արդյունքում զոհվածների ընտանիքներին մինչ դատարանի որոշումը:
Նրա խոսքով՝ հետաքննության ընթացքում մանրակրկիտ քննարկվել են ինքնաթիռի կործանման գործի բոլոր ասպեկտները: 2020 թվականի դեկտեմբերին Իրանի իշխանությունները պայմանավորվել էին ուկրաինական ինքնաթիռի հետ կապված միջադեպի յուրաքանչյուր զոհի ընտանիքին 150 000 ԱՄՆ դոլարի փոխհատուցում վճարել:
Դրանից առաջ Իսմայիլին հայտնել էր, որ Իրանում ուկրաինական ինքնաթիռի կործանմանը մասնակցության մեջ կասկածվողների դատավարությունը տեղի կունենա մոտ ապագայում:
«Ուկրաինայի միջազգային ավիաուղիների» «Բոինգ 737»-ը վթարի էր ենթարկվել 2020 թվականի հունվարի 8-ին՝ Թեհրանի օդանավակայանից թռիչքից մի քանի րոպե անց: Արդյունքում մահացել էր 176 մարդ՝ Աֆղանստանի, Գերմանիայի, Իրանի, Կանադայի եւ Ուկրաինայի քաղաքացիներ, ինչպես նաեւ՝ Մեծ Բրիտանիայի եւ Շվեդիայի քաղաքացիներ: Իր վերջնական տեխնիկական զեկույցում Թեհրանը նշել է, որ ինքնաթիռը ոչնչացվել է հակաօդային պաշտպանության օպերատորի սխալի պատճառով: Իրանական կողմը պնդում է, որ ինքնաթիռը պատահաբար որպես «թշնամու թիրախ» է ճանաչվել:
