Կիեւի ու ՆԱՏՕ-ի վարժանքները անվերջ ապակայունացման սադրանք են Ռուսաստանի սահմանի երկայնքով: Այս մասին շաբաթ օրը հայտարարել է ՌԴ ԱԳՆ պաշտոնական ներկայացուցիչ Մարիա Զախարովան, հայտնում է ՏԱՍՍ-ը:
«Չէ որ մենք հիանալի հասկանում ենք, որ այդ վարժանքները եւս երկու գլոբալ նպատակ են հետապնդում: Առաջինը Ռուսաստանի սահմանի երկայնքով անվերջ ապակայունացումն է: Սա սադրանք է՝ հրահրելու, մարտահրավեր նետելու համար: Իսկ այդ պատասխանը պետք է լինի, քանի որ սա ինքնիշխան պետություն է, ինքնիշխան սահման: Եւ որոշ ագրեսիվ գործողություններին անընդհատ պատասխանելը սադրիչ գործողություն է»,- ասել է նա:
«Եւ երկրորդ պահը՝ տեխնիկայի տարբեր տեսակների, զենքի եւ սարքավորումների տեղափոխումն է Ուկրաինայի տարածք եւ դրանք այնտեղ թողնելը»,- հավելել է Զախարովան:
Նրա խոսքով՝ այս բոլոր գործողությունները դուրս են գալիս համաձայնագրերի, պայմանավորվածությունների եւ, ամենակարեւորը, վերահսկողության շրջանակից: «Նրանք դիվերսիոն գործունեությամբ են զբաղվում»,- ասել է նա:
ՌԴ ԱԳՆ պաշտոնական ներկայացուցիչը նաեւ նշել է, որ ՆԱՏՕ-ի երկրներն այս տարի յոթ վարժանք են անցկացնում Ուկրաինայի տարածքում: «Այնտեղ բոլոր ճակատներում արդեն կոլապս է մոտենում, իսկ նրանք դեռ սովորեցնում են: Ընդհանրապես, անհասկանալի է, թե ինչ են սովորեցնում, դժվար թե՝ ինչպես կռվել, մեծ հաշվով»,- ասել է նա:
Բրիտանական հածանավի հետ կապված իրավիճակն ապացուցում է, որ ՆԱՏՕ-ն չի ցանկանում Ռուսաստանի հետ հաղորդակցման հատուկ ուղիներ օգտագործել՝ նման դեպքերը կանխելու համար, ասել է Զախարովան:
«Եթե ձեր ուղերձը բարեկամական է, իսկապես բաց, խաղաղ, միշտ իրավիճակից շտապ դուրս գալու հնարավորություն կա: Մենք ունենք բոլոր դիվանագիտական ուղիները, որոնք գործում են, մենք ունենք հատուկ ալիքներ: Տարբեր երկրներ աշխատում են տարբեր ձեւաչափերով` համաձայնեցված, նման իրավիճակներում օգտագործման համար ընդունված: Զանգահարեք, շտապ տեղեկություններ ստացեք ցանկացած գծի վերաբերյալ: Դա արդեն մեկ այլ իրավիճակ է»,- ասել է նա: «[Այս իրավիճակը] ապացուցում է, որ պետությունների միջեւ գոյություն ունեցող հատուկ կապի կամ հաղորդակցության ուղիները արգելափակված են ՆԱՏՕ-ի կողմից»:
Դիվանագետի խոսքով՝ Մոսկվայում «սադրանք» բառը հազվադեպ է արտասանվում, բայց Սեւ ծովում տեղի ունեցած միջադեպը տեղ չի թողնում կատարվածի այլ որակումների համար: «Ռուսաստանին անընդհատ անհիմն մեղադրում են նման ենթադրաբար ապակայունացնող վարքի մեջ, բայց իրականում իրավիճակը ապակայունացնում է ոչ թե Ռուսաստանը, այլ մեր արեւմտյան գործընկերները»,- ընդգծել է Զախարովան: «Սեւ ծովում բրիտանացիների եւ բրիտանական հածանավի վարքագիծը նրանց իրավիճակից դուրս գալու որեւէ հնարավորություն չի թողնում։ Եւ ահա ինձ թվում է, որ այս օրինակից հետո հարկավոր է նրանց պահվածքը գնահատելիս ավելի հաճախ օգտագործել «սադրանք», «կանխամտածված սադրանք» բառերը։ «Այդ դեպքում ամեն ինչ իր տեղը կընկնի։
