Starlink-ի արբանյակային ինտերնետային բիզնեսի ներդրման ընդհանուր արժեքը կկազմի 20-ից 30 միլիարդ դոլար: Այս մասին հայտարարել է միլիարդատեր Իլոն Մասկը, հայտնում է Reuters-ը:
Tesla Inc-ի գործադիր տնօրենը եւ SpaceX-ի հիմնադիրն ասել է, որ ներդրումների նախնական ծախսերը կկազմեն 5-10 միլիարդ դոլար, նախքան Starlink-ը հասնի զգալի դրական դրամական հոսքերի: «Դա, ըստ էության, շատ է»,- ասել է Մասկը:
Starlink-ը, որ ցածր երկրային ուղեծրի արբանյակների հավաքածու է, որն ապահովում է գերարագ կապ հեռավոր շրջաններում ապրող մարդկանց համար, արդեն առաջարկում է փորձնական ծառայություն:
Ընկերությունն այժմ ունի ավելի քան 1500 արբանյակ եւ գործում է շուրջ մեկ տասնյակ երկրներում, ամեն ամիս ավելացնելով, ասել է Մասկը, կանխատեսելով, որ հաջորդ 12 ամիսների ընթացքում 69 000 հաճախորդների ընդհանուր թիվը կհասնի կես միլիոնի:
Թերահավատները կասկածում են, թե արդյոք արբանյակային ինտերնետը երբեւէ կկարողանա՞ մշակել կենսունակ բիզնես մոդել, որովհետեւ դրա հիմնական թիրախը հեռավոր շրջաններում ապրող մարդիկ են, չափազանց քիչ՝ սկզբնական ներդրումների հսկայական ծախսերը հոգալու համար:
Մասկը դեմ է այդ գաղափարին՝ ասելով, որ Starlink-ը կարող է օգնել լրացնել հինգերորդ սերնդի բջջային եւ մանրաթելային ցանցերի բացերը: «Կապն անհրաժեշտ է այնտեղ, որտեղ հիմա չկա»,- ասել է Մասկը:
