Համոզված ասում եմ, որ ոչ իշխանությունը, ոչ ժողովուրդը չի ընդունի պայման, որով Արցախը կմտնի Ադրբեջանի կազմի մեջ։ Այս մասին հուլիսի 1-ին ասաց Արցախի պետական նախարար Արտակ Բեգլարյանը։
«Պայմանները մեզ համար ավելի ծանր են, քան նրանք, որոնք կային պատերազմից առաջ։ Բայց դա չի նշանակում, որ մենք պայքարելու հնարավորություններ չունենք։ Ի հայտ են եկել լրացուցիչ հնարավորություններ, այդ թվում արտաքին քաղաքական հնարավորություններ ինքնորոշման մեր իրավունքի պաշտպանությունը կազմակերպելու համար։ Միջազգային հանրության համար առկա փաստարկների հետ կապված դա հասկանալի է։ Հակամարտության կարգավորման երեք հիմնական սկզբունքներից երկուսը՝ տարածքային ամբողջականության հարցն ու ուժի եւ ուժի սպառնալիքի չկիրառման սկզբունքը, պատերազմի արդյունքում հնացել են, կորցրել ակտուալությունը։ Մնացել է մեր ինքնորոշման սկզբունքը։ Միջազգային հանրությունը եւ ԵԱՀԿ ՄԽ-ն դա լավ գիտակցում են։ Այս ուղղությամբ մենք մեր պայքարը կշարունակենք։ Հայաստանը նույնպես պետք է ջանքեր գործադրի։ Հույս ունենք, որ շուտով առաջընթաց կգրանցվի»,- ավելացրեց նա։
