Բրիտանացին երկու քույրերի է սպանել՝ «սատանայի հետ գործարք» կնքելով: Դրա համաձայն՝ յուրաքանչյուր վեց ամսում վեց կին սպանելու դիմաց նա շահելու է վիճակախաղում:
Սարսափազդու «գործարքի» մանրամասները բարձրաձայնվել են 19-ամյա Դանյալ Հուսեյնի դատավարության ժամանակ, հայտնել է The Sun-ը:
Հուսեյնը մեղադրվում է անցյալ տարվա հունիսին Լոնդոնի այգիներից մեկում 46-ամյա Բիբաա Հենրիի եւ 27-ամյա Նիկոլ Սմոլմանի սպանությունների մեջ:
Երդվյալ ատենակալներին է հանձնվել Հուսեյնի ձեռագրով «սատանայի հետ գործարքի» կրկնօրինակը, որը գտնվել է նրա ննջասենյակում՝ մակագրված նրա արյամբ:
«Լյուցիֆուգ Ռոֆոկալի հետ գործարքի» համաձայն` Հուսեյնը պարտավորվել է «յուրաքանչյուր վեց ամսում նվազագույնը վեց զոհ մատուցել»: Նա նաեւ խոստացել է «սպանել միայն կանանց», «տաճար կառուցել» եւ «անել ամենը, ինչ խոստացել է»:
Փոխարենը Հուսեյնը խնդրել է «շահել Mega Millions սուպեր ջեքփոթը», պարգեւատրվել «հարստությամբ եւ ուժով» եւ «երբեք ոստիկանության կողմից չկասկածվել հանցագործությունների մեջ»:
Դատախազության հաղորդմամբ՝ Հուսեյնը դաժան սպանություններին հաջորդած օրերին վիճակախաղի մի քանի տոմս է գնել: