Ամերիկյան զորքերը դուրս են եկել Աֆղանստանի Բաղրամ կայանից՝ թալիբների հետ համաձայնության համապատասխան։ «Ամերիկացի բոլոր զինվորները եւ ՆԱՏՕ զինծառայողները դուրս են եկել Բաղրամ ավիաբազայից»,- ասել է ԱՄՆ անվտանգության ծառայության բարձրաստիճան աշխատակիցը՝ չցանկանալով նշել անունը, տեղեկացնում է Reuters-ը։
Կայանը կհանձնվի աֆղանական կառավարությանը շաբաթ օրվա արարողության ժամանակ։
ԱՄՆ պաշտպանության նախարարության ներկայացուցիչը հայտարարել է, որ Աֆղանստանում ԱՄՆ գլխավոր հրամանատար, գեներալ Օսթին Միլերը «նախկինի պես պահպանում է Քաբուլում տեղակայված ուժերի պաշտպանության բոլոր հնարավորություններն ու լիազորությունները»։
Ենթադրվում է, որ ամերիկացի բոլոր զինծառայողները Աֆղանստանից կհեռանան մինչեւ հուլիսի 4-ը, մի մասը կմնա դեսպանության պաշտպանության համար։
Թալիբների հետ համաձայնությունը ԱՄՆ զորքերը դուրս բերելու մասին կնքվել է նախագահ Դոնալդ Թրամփի վարչակազմի օրոք։
ԱՄՆ հեռանալու դիմաց թալիբները խոստացել են կանխել միջազգային ահաբեկչությունը աֆղանական տարածքից։ Նրանք նաեւ հանձն են առել աֆղանական կառավարության հետ բանակցությունների մեջ մտնելու պարտավորություն, բայց բանակցություններում աննշան առաջընթաց է գրանցվել։
Աֆղանստանից արտասահմանյան զորքերի վերջնական դուրսբերումը, որը պաշտոնապես նշանակված է սեպտեմբերի 11-ին՝ ահաբեկչությունների 20-րդ տարելիցի օրը, չի հանգեցրել մարտական գործողությունների կրճատմանը թալիբների եւ Աֆղանստանի կառավարական ուժերի միջեւ։
Թալիբները առաջ են շարժվել մի քանի շրջաններում, հատկապես հյուսիսում, որտեղ նրանց արտաքսումից հետո շատ տարիների ընթացքում նրանց ներկայությունը նվազագույն է եղել։
Ուրբաթ օրը պաշտոնատար անձինք հայտարարել են, որ մարտական գործողությունները կառավարական ուժերի եւ թալիբների միջեւ հյուսիսարեւելյան Բադահշան նահանգում ուժեղանում են։
